بھارتی ریاست کیرالا میں محکمہ جنگلات کی ایک بہادر خاتون افسر نے 18 فٹ لمبے خطرناک کنگ کوبرا کو رہائشی علاقے سے بحفاظت پکڑلیا، جس کے بعد سوشل میڈیا پر ان کی بہادری کو کافی سراہا جا رہا ہے۔
یہ واقعہ کیرالا کے علاقے آنچومرتھوموٹ میں پیش آیا جہاں اچانک ایک بڑے سانپ کو چشمے میں تیرتے ہوئے دیکھاگیا جس کے بعد مقامی افراد نے فوری محکمہ جنگلات کو اطلاع دی اور فاریسٹ افسر ڈاکٹر جی ایس روشنی موقع پر پہنچیں۔
سوشل میڈیا پر وائرل ویڈیو میں دیکھا جاسکتا ہے کہ خاتون افسر نہایت مہارت کے ساتھ سانپ کو پکڑنے کی کوشش کرتی ہیں۔
خاتون افسر روشنی ایک چھڑی اور سانپ پکڑنے والے بیگ کے ساتھ سانپ کو قابو میں لانے کی کوشش کرتی ہیں اور کئی منٹ کی مسلسل جدوجہد کے بعد وہ سانپ کو بیگ میں ڈالنے میں کامیاب ہوجاتی ہیں۔
فٹ لمبے خطرناک سانپ کو پکڑنے کے بعد سوشل میڈیا پر خاتون افسر کی بہادری کو کافی سراہا جارہا ہے۔ محکمہ جنگلات اور مقامی افراد کی جانب سے بھی روشنی کے اس اقدام کی بھرپور تعریف کی جا رہی ہے۔
بھارتی میڈیا کے مطابق خاتون افسر ڈاکٹر جی ایس روشنی 8 سالوں سے محکمہ جنگلات میں خدمات انجام دے رہی ہیں اور اب تک 800 سے زائد سانپوں کو پکڑ چکی ہیں۔
خاتون افسر کا کہنا تھا کہ جنوبی کیرالا میں کنگ کوبرا کا آنا نایاب سمجھا جاتا ہے اور کنگ کوبرا کو پکڑنے کا یہ ان کی زندگی کا پہلا تجربہ تھا۔
