ملک کے بالائی اور وسطی علاقوں میں شدید بارشوں سے ممکنہ سیلابی صورتحال کا الرٹ جاری

اسلام آباد: این ڈی ایم  اے نے ملک کے بالائی اور  وسطی علاقوں میں5  تا 8  اگست تک شدید بارشوں سے ممکنہ سیلابی صورتحال کا  الرٹ  جاری کردیا۔

این ڈی ایم اے کےنیشنل ایمرجنسی آپریشن سینٹر نے آئندہ ہفتے کے لیے ممکنہ موسمی صورتحال پر رپورٹ جاری کی ہے۔

این ڈی ایم اے کے مطابق دریائے چناب  اور دریائے جہلم میں درمیانے  سے اونچے درجے کے سیلاب کا خدشہ ہے۔ دریائے کابل میں نوشہرہ کے مقام پربہاؤ تیزہونے کا امکان ہے۔ سوات اور پنجکوڑہ کے ندی نالوں میں طغیانی کا خدشہ ہے۔ تربیلا،کالا باغ، چشمہ، تونسہ  اورگڈوبیراج میں درمیانے درجےکا  بہاؤ متوقع ہے۔

این ڈی ایم اے کے مطابق  ممکنہ بارشوں سے ہنزہ،گھانچے  اور شگر میں اچانک  سیلابی صورتحال  اور ندی نالوں میں طغیانی متوقع ہے۔ 

این ڈی ایم اےکا کہنا ہےکہ مون سون بارشوں کے نتیجے میں تربیلا ڈیم 94 فیصد اور  منگلا ڈیم 61 فیصد بھرچکا ہے۔ شہری علاقوں خصوصاً شمال مشرقی اور وسطی پنجاب میں نکاسی آب کے لیے ڈی واٹرنگ پمپس تیار رکھیں۔

این ڈی ایم اے کا کہنا ہےکہ تمام  متعلقہ اداروں کو  ممکنہ  خطرات کے حوالے  سے  بروقت آگاہی فراہم کی جارہی ہے۔

این ڈی ایم اے نے تمام متعلقہ اداروں کو ممکنہ  خطرات  سے نمٹنےکے لیے پیشگی اقدامات کی ہدایت کی ہے۔

این ڈی ایم اے کا کہنا ہےکہ ممکنہ سیلابی صورتحال کے حوالے سے حساس علاقوں میں غیرضروری سفرسے گریز کریں۔ تیزبہاؤکی صورت میں ندی نالوں، پلوں اورپانی میں ڈوبی سڑکوں سے گزرنے سےگریزکریں۔ مقامی انتظامیہ اور متعلقہ ادارے نشیبی علاقوں سے فوری نکاسی آب کے لیے ضروری مشینری تیار رکھیں۔