پاک چائنہ تعلقات وقت کے ساتھ مزید مضبوط اور گہرے ہو رہے ہیں،احسن اقبال

وفاقی وزیر منصوبہ بندی و ترقی احسن اقبال نے کہا ہے کہ پاک چائنہ تعلقات وقت کے ساتھ مزید مضبوط اور گہرے ہو رہے ہیں جبکہ بیلٹ اینڈ روڈ انیشیٹو کے تحت پاکستان کو صحت، تعلیم اور تحقیق کے شعبوں میں بھرپور فائدہ پہنچے گا۔ مذکورہ پراجیکٹ شعبہ صحت، ریسکیو اور دیگر شعبوں میں جدید ٹیکنالوجی اور معاونت فراہم کرے گا۔

نارووال میں چین کے تعاون سے ہیلتھ سیکٹر کے نئے پراجیکٹ کی لانچنگ تقریب سے خطاب کررہے تھے۔احسن اقبال نے کہا کہ آج کا دن صحت کے شعبے میں "ہیلتھ سلک روٹ” کے آغاز کا دن ہے جو پاکستان اور چین کے درمیان ایک نئی راہداری قائم کرے گا۔ یہ راہداری علم، ٹیکنالوجی اور ریسرچ پر مبنی ہوگی تاکہ دونوں ممالک صحت عامہ کے شعبے میں بھی ایک دوسرے کے تجربات اور وسائل سے فائدہ اٹھا سکیں۔انہوں نے کہا کہ ہم ایسا ایکو سسٹم بنانا چاہتے ہیں کہ دنیا بھر کے ریسرچر پاکستان کی طرف کھنچے چلے آئیں، جبکہ یہاں کے طلبہ چین جا کر تعلیم حاصل کریں اور واپس آکر ملک کی خدمت کریں۔ یہ سفر پاک چین دوستی کو مزید تقویت دے گا اور اس کے نتیجے میں پاکستان ترقی کی نئی منازل طے کرے گا۔احسن اقبال نے کہا کہ نارووال میڈیکل کالج میرا خواب تھا، اسے پاکستان کا سب سے بڑا اور جدید ادارہ بنایا جائے گا۔ میری خواہش ہے کہ پورے پاکستان کے طلبہ یہاں داخلہ لینے کو اعزاز سمجھیں۔ نارووال میڈیکل کالج پاکستان میں تعلیم کا روشنی کا مینار بنے گا۔ یہاں کے ڈاکٹر جدید ٹیکنالوجی سے لیس اور بہترین تربیت یافتہ ہیں، جو صحت کے شعبے میں ملک کی تقدیر بدلنے کی صلاحیت رکھتے ہیں۔انہوں نے کہا کہ جیسے ہماری مسلح افواج نے معرکہ حق میں دشمن کو شکست دی، اب اگلا معرکہ پاکستان کو معاشی میدان میں فتح دلانا ہے۔ اس کے لیے پاکستان کے ہر شہری کو اپنا کردار ادا کرنا ہوگا تاکہ ملک معاشی طور پر بھی ناقابلِ شکست بن سکے۔وفاقی وزیر نے کہا کہ پاکستان کی ترقی کے لیے امن، سیاسی استحکام اور پالیسیوں کے تسلسل کی ضرورت ہے۔ہمیں دن رات محنت کرنا ہوگی تاکہ پاکستان کو ایک مضبوط، خوشحال اور ترقی یافتہ ریاست بنایا جا سکے۔احسن اقبال نے کہا کہ دنیا میں اگر کسی نے اقتصادی ترقی کا معجزہ دکھایا ہے تو وہ چین ہے جس نے 80 کروڑ عوام کو غربت کی سطح سے نکال کر خوشحالی کی راہ پر ڈالا۔ پاکستان سی پیک جیسے منصوبوں کے ذریعے اس ترقیاتی سفر کو اپنے ملک میں منتقل کرنے کے لیے اقدامات کر رہا ہے۔انہوں نے کہا کہ ملکی ترقی کے لیے امن، سیاسی استحکام اور پالیسیوں کے تسلسل کی ضرورت ہے، اسی صورت میں پاکستان بھی ترقی اور خوشحالی کے نئے سفر پر گامزن ہو سکتا ہے۔وفاقی وزیر نے کہا کہ پاکستان کی آزادی کا دن پوری قوم کے لیے خوشیوں کا پیغام ہے، اس سال کا جشنِ آزادی ہمارے لیے خصوصی اہمیت کا حامل ہے۔ انہوں نے کہا کہ معرکہ حق میں دشمن کو جو سبق سکھایا گیا وہ نسلوں تک یاد رکھا جائے گا، اللہ تعالیٰ نے پاکستان کو ایک عظیم فتح سے نوازا جس پر پوری قوم اپنی بہادر مسلح افواج کو خراجِ تحسین پیش کرتی ہے۔احسن اقبال نے خیبر پختونخوا میں طوفانی بارشوں اور سیلاب سے متاثرہ خاندانوں سے ہمدردی کا اظہار کرتے ہوئے کہا کہ ایک ہیلی کاپٹر حادثے او سیلاب میں قیمتی جانوں کے ضیاع پر پوری قوم افسردہ ہے۔انہوں نے اپنے خطاب میں کہا کہ نشانِ امتیاز ملنے کا اصل سہرا ان کے ووٹرز اور عوام کو جاتا ہے جنہوں نے ہمیشہ ان پر اعتماد کیا۔