سابق وزیراعظم و مسلم لیگ (ن) کے صدر نواز شریف، وزیراعلیٰ پنجاب مریم نواز سے بنگلادیش کی عبوری حکومت کے چیف ایڈوائزر ڈاکٹر محمد یونس کے مشیربرائے مذہبی امور ڈاکٹرخالد حسین نے ملاقات کی۔
ملاقات میں بنگلادیش کے ہائی کمشنر ایم ڈی اقبال حسین خان بھی موجود تھے۔ بنگلادیش میں پاکستانی طلبہ کےلیے 500 نئی اسکالر شپس کا اعلان کیا گیا۔
اس موقع پر نواز شریف کا کہنا تھاکہ پاکستانی عوام کے دل آج بھی بنگلادیشی بھائیوں کی محبت سےموجزن ہے، پاکستان اور بنگلا دیش کی باہمی قربت بڑھانےکا بہترین وقت ہے، بنگلا دیش اپنے عوام کی معاشی ترقی کے حوالے سے تیزی سے ابھر کر سامنے آیا۔
مریم نواز کا کہنا تھاکہ پاکستان اور بنگلادیش کا رشتہ سرحدوں سے بالاترنسل درنسل بھائی چارےپرمشتمل ہے، تجارت اور براہ راست رابطے پاکستان، بنگلادیش کے عوامی تعلقات کوتقویت بخشیں گے، پنجاب بنگلادیش کے ساتھ گرین انرجی سمیت مختلف شعبوں میں تعاون کاخواہاں ہے۔
انہوں نے کہا کہ بنگلادیش کے ساتھ فلڈ منیجمنٹ، زرعی پائیداری میں بھی شراکت داری کاخیرمقدم کریں گے، خطے میں امن، خوشحالی کےلیے دوطرفہ دوستی کودیرپا شراکت داری میں بدلیں گے۔
ڈاکٹرخالد حسین کا کہنا تھاکہ بنگلادیش کے عوام ایٹمی دھماکا کرنے پر نوازشریف کو بڑے ہیرو کے طورپر دیکھتے ہیں، بنگلا دیش ہرسطح پر پاکستان کےساتھ تعلقات میں بہتری کا خواہاں ہے۔
