انجینئرز ملکی ترقی کے اصل معمار ہیں، پاک سعودی دفاعی معاہدہ خطے کے لیے گیم چینجر ہوگا: احسن اقبال

وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے کہا ہے کہ پاکستانی انجینئرز ملک کے اصل معمار ہیں اور قومی ترقی میں ان کا کردار ریڑھ کی ہڈی کی حیثیت رکھتا ہے۔

انہوں نے کہا کہ جیسے ماضی میں پاک-چین اقتصادی راہداری (سی پیک) ترقی کا نیا باب ثابت ہوئی، اسی طرح حالیہ پاک-سعودی دفاعی معاہدہ بھی خطے کی تقدیر بدلنے والا سنگ میل ہے جو پاکستان کے لیے گیم چینجر ثابت ہوگا۔

وہ ہفتے کو فیڈریشن آف انجینئرنگ انسٹی ٹیوشنز آف پاکستان میں منعقدہ ایک تقریب سے خطاب اور میڈیا سے گفتگو کر رہے تھے۔ تقریب میں انجینئر امیر ضمیر احمد خان، انجینئر محمد عثمان فاروق، انجینئر طاہر بشارت چیمہ، انجینئر سروش حشمت لودھی، انجینئر قسیم قریشی سمیت ملک بھر سے بڑی تعداد میں انجینئرز شریک تھے۔

“پاکستان کو معرکہ ترقی اور انوویشن جیتنا ہے”

احسن اقبال نے کہا کہ ماضی میں معرکہ حق نے پاکستان کا نام دنیا میں بلند کیا، اب پاکستان کو معرکہ ترقی اور انوویشن جیتنا ہے۔ “اگر ہم نے ایک میٹر کی بجائے ایک ہزار میٹر کی دوڑ جیتنی ہے تو ہمیں معیشت کو مضبوط اور اپنی مصنوعات کو عالمی معیار کے مطابق بنانا ہوگا۔”

انہوں نے کہا کہ ٹیکنالوجی کے میدان میں پاکستان کو آگے بڑھانے، موسمیاتی تبدیلیوں سے نمٹنے، واٹر سکیورٹی اور فوڈ چین کے تحفظ کے لیے بھی انجینئرز کا کردار بنیادی اہمیت رکھتا ہے۔

پاور سیکٹر اور معیشت کی بحالی میں انجینئرز کا کردار

وفاقی وزیر نے پاور سیکٹر پر گفتگو کرتے ہوئے کہا کہ اس شعبے کی اصلاح کی کنجی بھی انجینئرز کے پاس ہے۔ “اربابِ اختیار کو اربوں روپے کے بلیک ہولز ختم کرنا ہوں گے تاکہ سرکلر ڈیٹ پر قابو پایا جا سکے اور وسائل تعلیم و صحت جیسے اہم شعبوں پر خرچ ہوں۔”

انہوں نے مزید کہا کہ صحت کے شعبے میں ٹیلی میڈیسن اور جدید ٹیکنالوجی کے ذریعے انقلاب برپا ہو رہا ہے اور نوجوانوں و خواتین کو بااختیار بنانے کے لیے بھی انجینئرنگ برادری کا کردار اہم ہے۔

پاکستان کا ہدف: 2047 تک تین ٹریلین ڈالر کی معیشت

پروفیسر احسن اقبال نے کہا کہ پاکستان کا خواب ہے کہ 2047 تک ملک کو تین ٹریلین ڈالر کی معیشت بنایا جائے۔ اس مقصد کے لیے نوجوانوں کو اونرشپ دینا ہوگی۔ انہوں نے اعلان کیا کہ جلد “2047 نالج لیپ” منصوبے کا آغاز کیا جائے گا جس کا روڈ میپ نوجوانوں کی مشاورت سے تیار ہوگا۔

انہوں نے کہا کہ پاکستان کی ترقی کا سفر ماضی میں مالیاتی و معاشی عدم استحکام اور پالیسیوں کے تسلسل کے فقدان کی وجہ سے متاثر ہوا، مگر اب وزیراعظم محمد شہباز شریف کی قیادت میں ملک ترقی کے راستے پر گامزن ہے۔

پاک-سعودی دفاعی معاہدہ خطے کے لیے خوش آئند

وفاقی وزیر نے پاک-سعودی دفاعی معاہدے پر دونوں ممالک کی قیادت کو مبارکباد دیتے ہوئے کہا کہ یہ معاہدہ خطے میں امن، ترقی اور خوشحالی کے لیے گیم چینجر ثابت ہوگا۔ “پاکستان کا دفاع ناقابلِ تسخیر ہے اور اس کا سہرا بھی ہماری انجینئرنگ کمیونٹی کے سر ہے۔”