کراچی: محکمہ تعلیم سندھ نے صوبے بھر میں بڑے پیمانے پر اساتذہ کے تبادلے کرتے ہوئے دس ہزار سے زائد اساتذہ کو مختلف اسکولوں میں تعینات کر دیا ہے۔
محکمے کے مطابق ان تبادلوں کے نتیجے میں 1320 بند اسکول دوبارہ فعال ہو جائیں گے جبکہ مختلف اسکولوں میں موجود 1550 اساتذہ کی کمی بھی پوری کی جائے گی۔
کراچی سمیت صوبے بھر میں ایسے اسکول جہاں صرف ایک استاد تعینات تھا، وہاں بھی 1328 مزید اساتذہ تعینات کیے گئے ہیں تاکہ تدریس کا معیار بہتر بنایا جا سکے۔
ویڈ لاک پالیسی کے تحت تبادلے
محکمہ تعلیم کے مطابق ویڈ لاک پالیسی کے تحت مجموعی طور پر 1671 اساتذہ کے تبادلے کیے گئے ہیں جن میں 1198 خواتین اساتذہ شامل ہیں۔ یہ تبادلے خواتین اساتذہ کی سہولت کو مدنظر رکھتے ہوئے کیے گئے۔
اسی پالیسی کے تحت 473 مرد اساتذہ کے تبادلے بھی عمل میں لائے گئے ہیں۔
تعلیمی معیار بلند کرنے کی کوشش
محکمہ تعلیم سندھ کا کہنا ہے کہ یہ اقدامات صوبے کے تعلیمی اداروں کو فعال بنانے اور تعلیمی معیار کو بلند کرنے کی ایک اہم کاوش ہیں۔
