لاہور: پنجاب میں میڈیکل اور ڈینٹل کالجوں میں داخلے کے لیے ایم ڈی کیٹ (MDCAT) امتحان 26 اکتوبر 2025 کو منعقد ہوگا۔
امتحان کا اہتمام یونیورسٹی آف ہیلتھ سائنسز (یو ایچ ایس) کے زیرِ انتظام کیا جائے گا، جو صوبے کے 12 شہروں میں بیک وقت ہوگا۔
یو ایچ ایس کے مطابق اس سال پنجاب بھر سے 50 ہزار 458 امیدواروں نے ایم ڈی کیٹ کے لیے رجسٹریشن کرائی ہے۔
امتحان کے شفاف اور پرامن انعقاد کے لیے یو ایچ ایس اور محکمہ اسپیشلائزڈ ہیلتھ کیئر اینڈ میڈیکل ایجوکیشن نے تیاریاں مکمل کر لی ہیں۔
محکمہ صحت نے امتحانی انتظامات کے حوالے سے 12 اضلاع کے ڈپٹی کمشنرز کو مراسلے جاری کیے ہیں۔
امتحان کے روز لاہور سمیت 12 شہروں میں قائم 26 امتحانی مراکز پر ہائی الرٹ رہے گا۔
جاری مراسلے کے مطابق ریسکیو 1122، نادرا، محکمہ صحت، ٹریفک پولیس اور سیکیورٹی ادارے اپنے اپنے فرائض سرانجام دیں گے۔
اس کے علاوہ محکمہ داخلہ پنجاب کو بھی امتحانی مراکز کے اطراف دفعہ 144 کے نفاذ کے لیے درخواست دے دی گئی ہے تاکہ امن و امان برقرار رکھا جا سکے۔
امتحانی عملے کی تعیناتی کے لیے محکمہ ہائر ایجوکیشن اور محکمہ اسکول ایجوکیشن کو خطوط ارسال کیے گئے ہیں، جب کہ آئی جی پنجاب کو بھی سیکیورٹی پلان سے متعلق مراسلہ جاری کیا گیا ہے۔
یو ایچ ایس حکام کے مطابق امتحان کے شفاف انعقاد کے لیے سینئر فیکلٹی ممبران کو ڈیوٹیاں تفویض کر دی گئی ہیں۔
امتحانی عملے کی سیکیورٹی کلیئرنس کا عمل بھی مکمل کر لیا گیا ہے۔
