پشاور: پاکستان تحریک انصاف (پی ٹی آئی) خیبر پختونخوا کے صدر جنید اکبر نے وزیراعلیٰ علی امین گنڈاپور کے ترجمان فراز مغل کو عہدے سے فوری ہٹانے کا مطالبہ کر دیا ہے۔
یہ مطالبہ جنید اکبر کی جانب سے پارٹی کے مرکزی واٹس ایپ گروپ میں بھیجے گئے ایک آڈیو پیغام میں سامنے آیا، جس میں انہوں نے وزیراعلیٰ کی ٹیم پر تنقید کرتے ہوئے کہا کہ یہ ٹیم مسائل کو حل کرنے کے بجائے مزید بڑھا رہی ہے۔
ترجمان پر الزامات
جنید اکبر نے الزام لگایا کہ فراز مغل نے ان کی جانب سے سینیٹر ایمل ولی کی سیکیورٹی کے بارے میں کی گئی ٹوئٹ پر تنقید کی۔
ان کا کہنا تھا کہ فراز مغل پہلے بھی فیک اکاؤنٹس کے ذریعے منفی سرگرمیوں میں ملوث رہا ہے۔
وزیراعلیٰ کی حمایت کا تاثر
جنید اکبر نے کہا کہ اگر وزیراعلیٰ کا ترجمان ان کے خلاف ٹوئٹ کرتا ہے تو اس کا مطلب ہے کہ اسے وزیراعلیٰ کی آشیر باد حاصل ہے۔
انہوں نے واضح کیا کہ وہ یہ معاملہ پہلے ہی وزیراعلیٰ کے نوٹس میں لا چکے ہیں، لیکن اگر فراز مغل کو کل تک عہدے سے نہ ہٹایا گیا تو وہ اس کا بھرپور جواب دیں گے۔
سخت لہجہ اور پارٹی ناراضی
آڈیو پیغام میں جنید اکبر نے برہمی کا اظہار کرتے ہوئے کہا:
“اگر میں یہ لکھ دوں کہ تم لوگوں کی اتنی حیثیت نہیں کہ آئی جی تمہاری سنے تو پھر کیا ہوگا؟”
انہوں نے مزید کہا کہ وہ ایسے گروپ کا حصہ نہیں رہ سکتے جہاں پارٹی قیادت کی بے عزتی کی جائے، اس لیے وہ پی ٹی آئی کے مرکزی واٹس ایپ گروپ سے نکل رہے ہیں۔
