ڈی جی آئی ایس آئی لیفٹیننٹ جنرل عاصم ملک کی مدتِ ملازمت میں توسیع

راولپنڈی: سکیورٹی ذرائع کے مطابق ڈائریکٹر جنرل انٹر سروسز انٹیلی جنس (آئی ایس آئی) لیفٹیننٹ جنرل عاصم ملک اپنی موجودہ ذمہ داریاں جاری رکھیں گے۔ ان کی مدتِ ملازمت میں توسیع کر دی گئی ہے، تاہم اس توسیع کی مدت کے حوالے سے کوئی تفصیلات سامنے نہیں آئیں۔

لیفٹیننٹ جنرل عاصم ملک نے 30 ستمبر 2024 کو ڈی جی آئی ایس آئی کے طور پر اپنے عہدے کی ذمہ داریاں سنبھالی تھیں۔ اس سے قبل وہ جنرل ہیڈ کوارٹرز (جی ایچ کیو) میں ایڈجوٹینٹ جنرل کے طور پر خدمات انجام دے رہے تھے۔

فوجی ذرائع کے مطابق لیفٹیننٹ جنرل عاصم ملک پاکستان آرمی کے 80ویں لانگ کورس سے کمیشن حاصل کرنے والے افسر ہیں اور اپنے کورس میں اعزازی شمشیر (Sword of Honour) کے بھی حامل ہیں۔ ان کا تعلق بلوچ رجمنٹ سے ہے۔

انہوں نے بلوچستان میں ایک انفینٹری ڈویژن اور وزیرستان میں انفینٹری بریگیڈ کی کمانڈ کی ہے۔ اس کے علاوہ وہ چیف انسٹرکٹر نیشنل ڈیفنس یونیورسٹی (این ڈی یو) اور انسٹرکٹر کمانڈ اینڈ اسٹاف کالج کوئٹہ کے طور پر بھی خدمات انجام دے چکے ہیں۔
لیفٹیننٹ جنرل عاصم ملٹری آپریشنز ڈائریکٹوریٹ میں بھی اہم ذمہ داریاں نبھا چکے ہیں۔

وہ فورٹ لیون ورتھ (امریکا) اور رائل کالج آف ڈیفنس اسٹڈیز (برطانیہ) کے گریجویٹ ہیں۔ انہیں 6 اکتوبر 2021 کو لیفٹیننٹ جنرل کے عہدے پر ترقی دی گئی تھی۔
لیفٹیننٹ جنرل عاصم ملک کے پاس نیشنل ڈیفنس یونیورسٹی، اسلام آباد سے امریکا-پاکستان تعلقات کے موضوع پر پی ایچ ڈی کی ڈگری بھی ہے۔

ذرائع کا کہنا ہے کہ بلوچستان اور وزیرستان جیسے حساس اور چیلنجنگ علاقوں میں ان کا کمانڈ کا تجربہ انہیں ملکی سلامتی کے اہم ادارے کی قیادت کے لیے موزوں بناتا ہے۔