ملائیشیا: وزیراعظم محمد شہباز شریف سے ملائیشین بزنس گروپ گوبی پارٹنرز کے وفد نے ملاقات کی، جس کی سربراہی گوبی پارٹنرز کے کو-فاؤنڈر اور چیئرمین تھامس ساؤ نے کی۔ ملاقات میں پاکستان اور ملائیشیا کے درمیان اقتصادی و تجارتی تعاون کے فروغ پر تفصیلی تبادلہ خیال کیا گیا۔
وزیراعظم نے اس موقع پر کہا کہ پاکستان اور ملائیشیا کے درمیان اقتصادی و تجارتی شعبوں میں تعاون بڑھانے کی بے پناہ صلاحیت موجود ہے، جس کے لیے دونوں فریق بھرپور طریقے سے کام کر رہے ہیں۔ انہوں نے کہا کہ دونوں ممالک کے درمیان بزنس ٹو بزنس روابط کو فروغ دینے کے لیے گزشتہ روز منعقد ہونے والی پاکستان-ملائیشیا بزنس اینڈ انویسٹمنٹ کانفرنس ایک خوش آئند اقدام ہے۔
وزیراعظم شہباز شریف نے کہا کہ حکومت کاروبار کے لیے دوستانہ ماحول بنانے اور کاروبار کرنے میں آسانی پیدا کرنے کے لیے پرعزم ہے۔ انہوں نے بتایا کہ خصوصی سرمایہ کاری سہولت کونسل (SIFC) بیرونی سرمایہ کاروں کو ہر ممکن سہولت فراہم کرنے کے لیے کوشاں ہے۔
انہوں نے پاکستان کے اسٹارٹ اپ ایکو سسٹم پر گوبی پارٹنرز کے اعتماد کو سراہتے ہوئے کہا کہ حکومت سرمایہ کاری کے فروغ اور بنیادی ڈھانچے تک بہتر رسائی کے ذریعے اسٹارٹ اپس اور ابتدائی مرحلے کے سرمایہ کاروں کی معاونت کے لیے اصلاحات پر عمل پیرا ہے۔
وزیراعظم نے کہا کہ ایک پائیدار اسٹارٹ اپ ماحولیاتی نظام کی تشکیل کے لیے بین الاقوامی اور ملکی سرمایہ کاری کو متحرک کرنا حکومت کی اولین ترجیح ہے۔ انہوں نے مزید کہا کہ ڈیجیٹل معیشت — خاص طور پر فنٹیک، ای کامرس، اور آئی ٹی خدمات — قومی ترقی کی حکمت عملی میں کلیدی حیثیت رکھتی ہیں۔
شہباز شریف نے کہا کہ پاکستان کے آئی ٹی، ٹیکنالوجی اور مصنوعی ذہانت (AI) کے شعبوں میں وسیع استعداد کو مد نظر رکھتے ہوئے حکومت عالمی سرمایہ کاروں اور کاروباری گروپس کا خیرمقدم کرے گی۔
گوبی پارٹنرز کے وفد نے پاکستان میں ای-کامرس اور فنانشل ٹیکنالوجی کے شعبوں میں تعاون کی گہری دلچسپی کا اظہار کیا۔
ملاقات میں نائب وزیراعظم و وزیر خارجہ اسحاق ڈار، وفاقی وزیر تجارت جام کمال خان، وفاقی وزیر برائے قومی غذائی تحفظ و تحقیق رانا تنویر حسین، وفاقی وزیر اطلاعات و نشریات عطاء اللہ تارڑ، وزیراعظم کے معاون خصوصی طارق فاطمی اور اعلیٰ سرکاری حکام بھی موجود تھے۔
