واشنگٹن: وزیر خزانہ محمد اورنگزیب نے کہا ہے کہ پاکستان کو آئی ایم ایف کی 1.2 ارب ڈالر کی اگلی قسط دسمبر 2025 تک ملنے کی توقع ہے۔ انہوں نے کہا کہ آئی ایم ایف ایگزیکٹو بورڈ جلد اجلاس میں معاہدے کی منظوری دے گا، جس کے بعد رقم کی فراہمی عمل میں آئے گی۔
وزیر خزانہ ان دنوں دورۂ امریکا پر ہیں جہاں انہوں نے 20 ویں وزارتی اجلاس میں شرکت کی اور لاس اینڈ ڈیمیج فنڈ کو فوری طور پر فعال کرنے پر زور دیا۔
دورے کے دوران محمد اورنگزیب کی ملاقات انٹرنیشنل فنانس کارپوریشن (IFC) کے منیجنگ ڈائریکٹر مختار ڈیوپ سے ہوئی۔ ملاقات میں انہوں نے امید ظاہر کی کہ ایگزِم بینک جلد ریکوڈک منصوبے میں شمولیت اختیار کرے گا۔
اسی طرح وزیر خزانہ نے جے پی مورگن کے سینئر انتظامی وفد سے بھی ملاقات کی، جس میں دوطرفہ شراکت داری کو مزید فروغ دینے کی ضرورت پر زور دیا گیا۔
واشنگٹن میں پریس کانفرنس کرتے ہوئے وزیر خزانہ نے کہا کہ آئی ایم ایف پاکستان پر قومی مفاد کے خلاف کوئی شرط عائد نہیں کر سکتا۔ انہوں نے کہا کہ آئی ایم ایف پروگرام کے تحت کی گئی اقتصادی اصلاحات نے معیشت کو مستحکم کیا اور اب تک تمام اصلاحات پاکستان کی اپنی معاشی ترجیحات کے مطابق ہیں۔
وزیر خزانہ محمد اورنگزیب نے مزید بتایا کہ امریکا کے ساتھ تجارتی و ٹیرف معاہدہ ایک سے دو ہفتوں میں متوقع ہے، جبکہ حکومت نیویارک کے روزویلٹ ہوٹل کی نجکاری سے متعلق فیصلے کے قریب پہنچ چکی ہے۔
انہوں نے کہا کہ پاکستان کا اقتصادی پروگرام اب پائیدار استحکام اور سرمایہ کاری کے فروغ کی نئی سمت میں گامزن ہے، جس سے ترقیاتی اہداف کے حصول میں مدد ملے گی۔
