لاہور: وزیراعلیٰ پنجاب مریم نواز نے واضح کیا ہے کہ صوبے میں شہریوں کی جان و مال کے تحفظ اور بنیادی سہولتوں کی فراہمی پر کسی قسم کا سمجھوتہ نہیں کیا جائے گا۔ غفلت، ناقص کارکردگی اور لاپرواہی کے مرتکب افسران کے خلاف تبادلے، باز پرس اور سخت وارننگز کا عمل جاری ہے۔
لیہ میں گڑھے میں گر کر دو سالہ بچے کی المناک موت پر وزیراعلیٰ نے سخت نوٹس لیتے ہوئے اسسٹنٹ کمشنر لیہ حارث حمید کو میٹنگ میں بیٹھنے کی اجازت نہ دی اور فوری تبادلے کا حکم دیا۔ وزیراعلیٰ نے اس واقعے پر ڈپٹی کمشنر لیہ کی بھی سرزنش کی۔
وزیراعلیٰ مریم نواز کی زیر صدارت تمام کمشنرز، ڈپٹی کمشنرز اور اسسٹنٹ کمشنرز کے ساتھ تین گھنٹے طویل احتسابی ویڈیو لنک کانفرنس منعقد ہوئی، جس میں کھلے مین ہولز، سیوریج گڑھوں، کتے کے کاٹنے کے واقعات، خستہ حال انفراسٹرکچر اور قبضہ مافیا کے خلاف فوری اور مؤثر اقدامات کا حکم دیا گیا۔
وزیراعلیٰ نے ملتان، حافظ آباد اور بہاولنگر میں افسوسناک واقعات کے تسلسل پر متعلقہ ڈپٹی کمشنرز سے باز پرس کرتے ہوئے غفلت کو بے نقاب کیا۔ انہوں نے کہا کہ ایسے واقعات کے بعد نہیں بلکہ پہلے ہی افسران کو ایکشن لینا چاہیے۔ کتے کے کاٹنے کے واقعات کی روک تھام کے لیے اقدامات نہ ہونا انتہائی افسوسناک ہے، جبکہ کھلے مین ہول اور سیوریج کے گڑھوں کی مرمت افسران کی بنیادی ذمہ داری ہے۔
وزیراعلیٰ نے مختلف اضلاع میں کمشنرز کی ناموزوں کارکردگی کا سخت نوٹس لیتے ہوئے کے پی آئیز (Key Performance Indicators) کے معیار پر مکمل جانچ کا حکم دیا اور پنجاب بھر کے ڈپٹی کمشنرز و اسسٹنٹ کمشنرز کو اپنے سٹاف اور ماتحت افسران کے لیے واضح کے پی آئیز مقرر کرنے کی ہدایت کی۔ انہوں نے دوٹوک الفاظ میں کہا کہ کسی سیاسی دباؤ کی پروا نہیں کی جائے گی، گڈ گورننس اور شفافیت ہی حکومت کا نصب العین ہے۔
قبضہ مافیا کے خلاف کارروائیوں پر وزیراعلیٰ نے 3607 مقدمات کے فوری فیصلوں پر اطمینان کا اظہار کرتے ہوئے شاباش دی اور اے ڈی سی آرز اور اسسٹنٹ کمشنرز کو مزید بااختیار بنانے کا حکم دیا۔
شہری سہولت اور خوبصورتی کے حوالے سے وزیراعلیٰ نے پنجاب کے ہر بازار کو بیوٹیفکیشن ڈیزائن پکچر کے مطابق بنانے، فول پروف مانیٹرنگ یقینی بنانے، ہر سڑک کے ساتھ فٹ پاتھ تعمیر کرنے اور مارکیٹوں میں واضح و یکساں سائن بورڈز لگانے کا فیصلہ کیا۔ انہوں نے بازاروں اور مارکیٹوں میں ہریالی بڑھانے اور خوشگوار ماحول بنانے پر بھی زور دیا۔
خواتین کے لیے خصوصی اقدام کے طور پر وزیراعلیٰ نے لاہور کے تاریخی اچھرہ بازار کو خوبصورت اور آرام دہ بنانے کا تحفہ دیتے ہوئے وہاں کافی شاپس، پکوڑے اور چاٹ کے معیاری و خوبصورت اسٹالز، اور خریداروں کی سہولت کے لیے صاف ستھرے نئے ٹائلٹس بنانے کی ہدایت کی۔
اسی طرح قصور میں سٹیٹ آف دی فوڈ سٹریٹس اور جنرل بس اسٹینڈ کی تزئین و آرائش، شاہ کوٹ، واربرٹن، سانگلہ ہل کے بازاروں اور ننکانہ صاحب کے کلاک ٹاور کی بیوٹیفکیشن، پاکپتن میں بابا فرید بازار، برتن بازار اور کنال برج کی خوبصورتی مئی کے آخر تک مکمل کرنے کا ہدف مقرر کیا گیا ہے۔ ساہیوال کے پاکپتن بازار، صدر بازار اور برینڈ روڈ کی بیوٹیفکیشن 31 مئی تک، جبکہ اوکاڑہ کے گول چوک بازار، فوڈ سٹریٹس اور پارکنگ ایریا مئی سے قبل مکمل کرنے کی ہدایت جاری کی گئی ہے۔
وزیراعلیٰ مریم نواز شریف نے واضح کیا کہ شہریوں کی حفاظت، سہولت اور معیاری ماحول کی فراہمی حکومت پنجاب کی اولین ترجیح ہے اور اس میں کوتاہی کسی صورت برداشت نہیں کی جائے گی.
