انڈر 19 ایشیا کرکٹ کپ کے فائنل میں بھارت کو عبرتناک شکست دے کر ٹرافی اپنے نام کرنے والی پاکستانی ٹیم وطن واپس پہنچ گئی، جہاں اسلام آباد ایئرپورٹ پر کھلاڑیوں کا شاندار اور تاریخی استقبال کیا گیا۔
رات گئے اسلام آباد ایئرپورٹ پر شہریوں کی بڑی تعداد انڈر 19 کرکٹ ٹیم کے استقبال کے لیے موجود تھی۔ فاتح کھلاڑیوں پر پھولوں کی پتیاں نچھاور کی گئیں، انہیں پھولوں کے ہار پہنائے گئے اور گلدستے پیش کیے گئے۔ شہریوں نے ڈھول کی تھاپ پر رقص کیا اور خوب بھنگڑے ڈالے، جبکہ ایئرپورٹ کے باہر آتش بازی کا بھی مظاہرہ کیا گیا۔
استقبال کے دوران فضا پاکستان زندہ باد اور ٹیم کے حق میں نعروں سے گونجتی رہی۔ اس موقع پر پاکستان کرکٹ بورڈ کے چیف آپریٹنگ آفیسر سمیر احمد، ڈائریکٹر ہائی پرفارمنس عاقب جاوید اور دیگر پی سی بی حکام بھی موجود تھے۔ ایئرپورٹ سے تمام کھلاڑیوں کو وی آئی پی پروٹوکول میں مقامی ہوٹل پہنچایا گیا۔
دوسری جانب وزیراعظم شہباز شریف آج انڈر 19 کرکٹ ٹیم کے کھلاڑیوں سے ملاقات کریں گے، جس میں بھارت کو شکست دینے والے نوجوان کھلاڑیوں کی بھرپور حوصلہ افزائی کی جائے گی۔
واضح رہے کہ ایشین کرکٹ کونسل (اے سی سی) انڈر 19 ایشیا کپ کے فائنل میں پاکستان نے بھارت کو 191 رنز کے بھاری مارجن سے شکست دے کر ٹائٹل اپنے نام کیا۔ پاکستان نے مقررہ 50 اوورز میں 8 وکٹوں کے نقصان پر 347 رنز بنائے اور بھارت کو 348 رنز کا ہدف دیا۔
فائنل میں سمیر منہاس نے شاندار بیٹنگ کرتے ہوئے 113 گیندوں پر 17 چوکوں اور 9 چھکوں کی مدد سے 172 رنز کی دھواں دار اننگز کھیلی اور وہ ٹورنامنٹ کے ٹاپ اسکورر بھی رہے۔ 348 رنز کے تعاقب میں بھارتی ٹیم 156 رنز پر ڈھیر ہو گئی، بھارت کی جانب سے دیوندرن نے 36 اور سوریا ونشی نے 26 رنز بنائے۔
یہ پاکستان کا انڈر 19 ایشیا کپ کا دوسرا ٹائٹل ہے، اس سے قبل 2012 کے ایونٹ میں پاکستان اور بھارت مشترکہ طور پر فاتح قرار پائے تھے۔
