اسلام آباد: پاکستان کے نائب وزیر اعظم اور وزیر خارجہ اسحاق ڈار اور ایران کے وزیر خارجہ عباس عراقچی کے درمیان ایک اہم ٹیلی فونک رابطہ ہوا، جس میں خطے کی تیزی سے بدلتی ہوئی صورتحال اور ایران کو درپیش حالیہ چیلنجز پر تفصیلی گفتگو کی گئی۔
ترجمان دفتر خارجہ کے مطابق دونوں وزرائے خارجہ نے مشرقِ وسطیٰ اور ہمسایہ خطوں میں امن و استحکام کی مجموعی صورتحال کا جائزہ لیا اور اس بات پر زور دیا کہ موجودہ حالات میں سفارتی رابطوں اور مشاورت کا تسلسل انتہائی ضروری ہے۔ گفتگو کے دوران اسحاق ڈار نے خطے میں کشیدگی کم کرنے اور امن کے فروغ کے لیے پاکستان کی جانب سے نیک تمناؤں اور تعمیری کردار کے عزم کا اعادہ کیا۔
ترجمان کے مطابق نائب وزیر اعظم نے ایرانی وزیر خارجہ کو اس بات کا یقین دلایا کہ پاکستان خطے میں مکالمے، برداشت اور پرامن حل کی حمایت جاری رکھے گا، جبکہ دونوں رہنماؤں نے اس امر پر اتفاق کیا کہ باہمی دلچسپی کے امور پر قریبی رابطہ اور دوطرفہ مشاورت مستقبل میں بھی برقرار رکھی جائے گی۔
ٹیلی فونک گفتگو میں پاک ایران تعلقات، علاقائی تعاون، اور سفارتی سطح پر ہم آہنگی کو مزید مضبوط بنانے کے امکانات پر بھی تبادلۂ خیال کیا گیا۔ دونوں فریقین نے اس عزم کا اظہار کیا کہ موجودہ حالات میں باہمی رابطے نہ صرف دوطرفہ تعلقات کے لیے اہم ہیں بلکہ پورے خطے میں امن و استحکام کے لیے بھی کلیدی کردار ادا کر سکتے ہیں۔
دفتر خارجہ کے ترجمان کا کہنا تھا کہ پاکستان اور ایران کے درمیان اس نوعیت کے اعلیٰ سطحی روابط دونوں برادر ممالک کے درمیان اعتماد اور تعاون کی عکاسی کرتے ہیں، اور مستقبل میں بھی ایسے رابطے جاری رہیں
