مسجدِ نبویؐ صلی اللہ علیہ وآلہ وسلم میں رمضان المبارک کے دوران افطار فراہم کرنے والوں کے لیے نئے قوانین متعارف کروائے گئے ہیں، جس کے لئے پیشگی اجازت نامہ (پرمٹ) لینا لازمی ہو گا۔
عرب میڈیا کا اس حوالے سے کہنا ہے کہ جنرل اتھارٹی برائے حرمین شریفین نے مسجدِ نبویؐ میں افطار فراہم کرنے کے خواہش مند افراد اور اداروں کے لیے ایک آن لائن پورٹل متعارف کرادیا ہے۔
رپورٹس کے مطابق روزہ داروں کو افطاری کرانے کی سعادت حاصل کرنے کے خواہش مندوں کا اندراج اس پورٹل کے ذریعے کیا جائے گا۔
افطاری کرانے کے اجازت صرف اتھارٹی کی منظور شدہ کمپنیوں اور افراد کو ہو گی، جن کی فہرست شائع کی جائے گی۔
قوانین کے مطابق افطار کرانے والے بنیادی مینیو میں 2 اضافی اشیاء شامل کر سکیں گے، بنیادی اشیاء میں کھجور، روٹی، دہی، رول اور پانی شامل ہیں۔
اضافی اشیاء کی اگر بات کی جائے تو اس میں گری دار میوے، کپ کیک، پائی، مامول (بسکٹ کی ایک قسم)، کریم یا بھری ہوئی کھجوروں کے آپشن موجود ہیں۔
اتھارٹی برائے حرمین شریفین کے مطابق افطاری کروانے والوں کے اندراج سے افطاری کو منظم اور باوقار انداز سے تکمیل کو پہنچایا جا سکے گا۔
سروس فراہم کرنے والوں سے ایجنسی نے مطالبہ کیا ہے کہ وہ سروس کی فراہمی کو یقینی بنانے کے لیے اپنا ڈیٹا لازمی اپ ڈیٹ کریں۔
