اسلام آباد: ملک میں ہفتہ وار مہنگائی کی شرح میں مسلسل تیسرے ہفتے بھی اضافہ ریکارڈ کیا گیا ہے۔ گزشتہ ہفتے مہنگائی میں 0.49 فیصد اضافہ ہوا، جس کے بعد مجموعی شرح 4.57 فیصد تک پہنچ گئی۔
ادارہ شماریات کے مطابق گزشتہ ہفتے کے دوران 24 اشیائے ضروریہ مہنگی جبکہ 8 اشیاء کے نرخوں میں کمی ریکارڈ کی گئی۔ گندم آٹا، لہسن، آلو، گھی، لکڑی اور ایل پی جی ان اشیاء میں شامل ہیں جن کی قیمتوں میں نمایاں اضافہ ہوا۔
رپورٹ کے مطابق ٹماٹر 33 فیصد، پیاز 9 فیصد اور انڈے 2 فیصد سے زائد مہنگے ہوئے۔ ایک ہفتے میں ٹماٹر کی قیمت میں 82 روپے فی کلو اضافہ ہوا اور اوسط قیمت 328 روپے فی کلو ریکارڈ کی گئی، جبکہ مختلف شہروں میں یہ 170 سے 420 روپے فی کلو تک فروخت ہوا۔
اسی طرح 20 کلو آٹے کا تھیلا اوسطاً 30 روپے مہنگا ہوا، جس کی قیمت 2180 روپے تک پہنچ گئی۔ مختلف شہروں میں آٹے کے تھیلے کی قیمت 1810 سے 2900 روپے کے درمیان رہی۔
ادارہ شماریات کے مطابق چینی بھی 67 پیسے فی کلو مہنگی ہوکر اوسط 185 روپے فی کلو تک جا پہنچی، جبکہ بعض شہروں میں چینی 177 سے 200 روپے فی کلو میں فروخت ہوئی۔
دوسری جانب زیرِ جائزہ ہفتے میں زندہ برائلر مرغی 6.38 فیصد، کیلے 5 فیصد تک سستے ہوئے۔ اس کے علاوہ دال چنا، باسمتی چاول، دال مونگ، پیٹرول اور ڈیزل کی قیمتوں میں بھی کمی ریکارڈ کی گئی۔
گزشتہ ہفتے 19 اشیائے ضروریہ کی قیمتوں میں استحکام رہا۔
سالانہ بنیاد پر ٹماٹر 121 فیصد، چکن 30 فیصد اور دال چنا 29 فیصد تک مہنگی ہوئی۔
