رائیونڈ میں تھری وہیلر الیکٹرک وہیکلز پلانٹ کا افتتاح صوبائی وزیرِ صنعت و تجارت پنجاب چوہدری شافع حسین نے کر دیا۔ افتتاحی تقریب میں صوبائی وزیر نے الیکٹرک رکشہ کی تیاری کے مختلف مراحل کا جائزہ لیا اور صنعت کاروں سے خطاب کرتے ہوئے کہا کہ وزیراعلیٰ پنجاب مریم نواز کی قیادت میں صوبائی حکومت الیکٹرک وہیکلز سیکٹر کے فروغ پر خصوصی توجہ دے رہی ہے۔
چوہدری شافع حسین نے بتایا کہ پنجاب کی ای وی پالیسی جلد متعارف کروائی جا رہی ہے جبکہ انوائرمنٹ کریڈٹ پالیسی پر بھی کام جاری ہے۔ انہوں نے کہا کہ چین سے ایک ہزار الیکٹرک بسیں منگوائی گئی ہیں اور کوشش کی جا رہی ہے کہ الیکٹرک بسوں کا اسمبلنگ پلانٹ بھی پنجاب میں قائم کیا جائے، جس سے آلودگی اور اسموگ کے خاتمے میں مدد ملے گی۔
صوبائی وزیر نے انڈسٹریل اسٹیٹس سے متعلق حکومتی اقدامات پر بات کرتے ہوئے کہا کہ وزیراعلیٰ مریم نواز نے سیالکوٹ میں 1400 ایکڑ بنجر اراضی پر نئی انڈسٹریل اسٹیٹ کی منظوری دے دی ہے۔ آسان کاروبار فنانس اسکیم کے تحت کاروباری سرگرمیوں کے فروغ کے لیے بلاسود قرضے فراہم کیے جا رہے ہیں جبکہ بزنس فیسلی ٹیشن سینٹرز کا دائرہ کار بھی مزید شہروں تک بڑھایا جا رہا ہے۔
انہوں نے بتایا کہ انڈسٹریل اسٹیٹس میں برسوں سے جاری رئیل اسٹیٹ کا کاروبار ختم کر دیا گیا ہے اور پراپرٹی مافیا کا خاتمہ کر دیا گیا ہے۔ صنعتی پالیسی کے تحت یونٹس قائم نہ کرنے والے افراد کے پلاٹ منسوخ کیے جا رہے ہیں۔ بھاولپور انڈسٹریل اسٹیٹ میں پہلی بار 7 فیکٹریوں کی تعمیر شروع ہو رہی ہے جبکہ قائداعظم بزنس پارک شیخوپورہ میں بھی 6 نئے کارخانے لگائے جائیں گے۔
چوہدری شافع حسین نے کہا کہ انہوں نے چین کے 3 دورے کیے جہاں بڑے سرمایہ کار گروپوں سے اہم ملاقاتیں ہوئیں۔ ان کا کہنا تھا کہ نئی انڈسٹریل اسٹیٹس صرف بنجر زمینوں پر بنانے کی کوشش کی جا رہی ہے تاکہ زرعی زمینوں کا تحفظ یقینی بنایا جا سکے۔
سابق حکومت پر تنقید کرتے ہوئے انہوں نے کہا کہ پی ٹی آئی نے پنجاب میں 6 اسپتال بنانے کے دعوے کیے مگر کوئی بھی مکمل نہ ہو سکا، جبکہ موجودہ حکومت دو سال کی مدت میں 2 نئے اسپتال مکمل کر چکی ہے۔ صوبائی وزیر نے کہا کہ مریم نواز کی قیادت میں پنجاب حکومت عوامی فلاح کے لیے تاریخی اقدامات کر رہی ہے۔
