کراچی: پاکستان اسٹاک ایکسچینج میں آج کاروباری ہفتے کے آخری روز شاندار تیزی دیکھنے میں آئی، جہاں سرمایہ کاروں کے اعتماد میں اضافے کے باعث مارکیٹ مثبت زون میں کھلتے ہی بھرپور تیزی کی جانب گامزن ہو گئی۔
جمعہ کے روز کاروبار کے آغاز پر ہی مارکیٹ میں مثبت رجحان غالب رہا اور کے ایس ای ہنڈرڈ انڈیکس تیزی کے ساتھ اوپر جانا شروع ہوا۔ ابتدائی لمحات میں ہنڈرڈ انڈیکس 1881 پوائنٹس کے نمایاں اضافے کے ساتھ 183,338 پوائنٹس کی سطح پر پہنچ گیا، جبکہ کچھ ہی دیر بعد مجموعی اضافہ 2575 پوائنٹس تک جا پہنچا۔
کاروبار کے دوران خریداروں کی سرگرمیوں میں مزید اضافہ دیکھنے میں آیا جس کے نتیجے میں مارکیٹ میں تیزی کا رجحان برقرار رہا۔ ہنڈرڈ انڈیکس مزید 3152 پوائنٹس بڑھ کر ایک لاکھ 84 ہزار 600 پوائنٹس کی سطح سے بھی تجاوز کر گیا، جو مارکیٹ میں مضبوط اعتماد اور مثبت توقعات کی عکاسی کرتا ہے۔
اعداد و شمار کے مطابق آج صرف ڈیڑھ گھنٹے کے دوران پاکستان اسٹاک ایکسچینج کا ہنڈرڈ انڈیکس تقریباً 1.7 فیصد تک بڑھ گیا، جس سے سرمایہ کاروں میں جوش و خروش دیکھنے میں آیا۔ مارکیٹ تجزیہ کاروں کے مطابق مثبت معاشی اشاریے اور سرمایہ کاری کے بہتر امکانات مارکیٹ میں تیزی کی بڑی وجوہات ہیں۔
