لاہور: وزیراعلیٰ پنجاب مریم نواز شریف کے وژن کی روشنی میں واسا لاہور نے صوبائی حکومت کے ہم قدم رہتے ہوئے سموگ کے تدارک کے لیے بھرپور اقدامات شروع کر دیے ہیں۔
وزیر ہاؤسنگ بلال یاسین نے ڈی جی واسا پنجاب طیب فرید اور ایم ڈی واسا غفران احمد کے ہمراہ غوث اعظم روڈ، مین بلیوارڈ فیصل ٹاؤن اور خیابانِ فردوسی جوہر ٹاؤن کے مختلف مقامات کا دورہ کیا، جہاں انہوں نے واسا کی جانب سے جاری پانی کے چھڑکاؤ اور صفائی کے عمل کا تفصیلی جائزہ لیا۔
بریفنگ کے دوران بتایا گیا کہ واسا لاہور روزانہ کی بنیاد پر مختلف شاہراہوں پر چھڑکاؤ کر رہا ہے تاکہ فضاء میں گرد و غبار اور آلودگی کو کم کرکے سموگ کے اثرات میں نمایاں کمی لائی جا سکے۔
ایم ڈی واسا غفران احمد نے کہا کہ ادارہ اپنے تمام وسائل بروئے کار لا کر شہریوں کے لیے صاف اور صحت مند ماحول کی فراہمی کے لیے پرعزم ہے۔
صوبائی وزیر ہاؤسنگ بلال یاسین نے ہدایت کی کہ تمام ترقیاتی منصوبوں کے مقامات پر پانی کے باقاعدہ چھڑکاؤ کو یقینی بنایا جائے، جب کہ تعمیراتی ملبہ، مٹی اور گردوغبار کے خاتمے کے لیے خصوصی ٹیمیں تعینات کی جائیں۔
انہوں نے مزید کہا کہ شہری علاقوں میں صفائی کے عمل کو مزید تیز کیا جائے اور واسا، ایل ڈبلیو ایم سی اور ٹریفک پولیس کے درمیان مربوط کوآرڈینیشن برقرار رکھی جائے تاکہ سموگ کے تدارک کے لیے اقدامات زیادہ مؤثر ثابت ہوں۔
بلال یاسین نے شہریوں سے اپیل کی کہ وہ عوامی آگاہی مہم کا حصہ بنیں اور اپنے اردگرد کے ماحول کو صاف ستھرا رکھنے میں کردار ادا کریں۔
وزیر ہاؤسنگ نے خیابانِ فردوسی جوہر ٹاؤن میں ٹرنک سیوریج سسٹم کے منصوبے کا بھی معائنہ کیا اور کام کی رفتار پر اطمینان کا اظہار کیا۔
انہوں نے کہا کہ وزیراعلیٰ مریم نواز شریف کی ہدایت پر لاہور کو سموگ فری شہر بنانے کے لیے تمام ادارے مشترکہ حکمتِ عملی کے تحت سرگرم عمل ہیں۔
