تھائی لینڈ: تھائی لینڈ میں ہونے والے مس گرینڈ انٹرنیشنل 2025 کے مقابلہ حسن کے دوران ایک حیران کن اور تاریخی واقعہ پیش آیا، جب ایک حسینہ غلطی سے خود کو فائنل کے لیے منتخب سمجھ بیٹھی۔
تفصیلات کے مطابق، مقابلہ حسن کے دوران جب فائنلسٹ کے ناموں کا اعلان کیا جا رہا تھا تو وسطی امریکی ملک پانامہ کی نمائندہ اسامر (Isamar) نے یہ سمجھا کہ ان کا نام پکارا گیا ہے۔ وہ خوشی کے عالم میں اسٹیج پر آگے بڑھ گئیں اور اپنے انتخاب کا جشن منانے لگیں۔
تاہم کچھ لمحوں بعد انہیں احساس ہوا کہ اصل میں منتخب ہونے والی امیدوار مس پیراگوئے، سیسیلیا رومیرو (Cecilia Romero) تھیں۔ اپنی غلطی کا ادراک ہونے پر اسامر فوراً مایوس چہرے کے ساتھ اسٹیج سے واپس پلٹ گئیں۔
یہ غیر معمولی لمحہ مقابلے کے دوران ریکارڈ ہوگیا اور اس کی ویڈیو دیکھتے ہی دیکھتے سوشل میڈیا پر وائرل ہوگئی۔ صارفین کی جانب سے اس واقعے پر مخلوط ردِعمل سامنے آیا — کچھ لوگوں نے اسے دلچسپ قرار دیا، جبکہ کئی نے مس پانامہ کے لیے ہمدردی اور شرمندگی کا اظہار کیا۔
سوشل میڈیا صارفین کا کہنا ہے کہ یہ واقعہ ایک بار پھر یاد دلاتا ہے کہ لائیو شوز میں ایک لمحے کی غلط فہمی بھی دنیا بھر میں وائرل لمحہ بن سکتی ہے۔
