ریاض/ممبئی: بالی وڈ اسٹار سلمان خان سعودی عرب میں ایک تقریب کے دوران بلوچستان کو الگ ملکوں کے ساتھ شامل کرنے سے متعلق بیان دینے پر شدید تنقید کی زد میں آگئے۔
تفصیلات کے مطابق سلمان خان نے سعودی عرب کے دارالحکومت ریاض میں منعقدہ Joy Forum میں گفتگو کے دوران کہا:
“اگر کوئی بالی وڈ، تامل، تیلگو یا ملیالم فلم یہاں (سعودی عرب میں) ریلیز کی جائے تو سپر ہٹ ہوجاتی ہے اور سیکڑوں کروڑ کا بزنس کرتی ہے، کیونکہ یہاں مختلف ممالک سے لوگ کام کرنے آتے ہیں، یہاں بلوچستان سے لوگ آتے ہیں، یہاں افغانستان سے لوگ آتے ہیں، یہاں پاکستان سے لوگ آکر کام کرتے ہیں۔”
سلمان خان کی یہ گفتگو سوشل میڈیا پر وائرل ہوتے ہی صارفین کی جانب سے سخت ردِعمل سامنے آیا۔
متعدد پاکستانی صارفین نے اداکار کو یاد دلایا کہ بلوچستان پاکستان کا صوبہ ہے، کوئی الگ ملک نہیں۔
ایک صارف نے لکھا:
“بلوچستان پاکستان کا حصہ ہے، تم اپنے خالصتان کی فکر کرو۔”
دوسرے صارف نے طنزیہ انداز میں کہا:
“سلمان خان کے مداح بھی دنیا بھر میں موجود ہیں، مثلاً خالصتان، ہندوستان اور افغانستان۔”
ایک اور صارف نے اداکار کو مخاطب کرتے ہوئے لکھا:
“سلمان خان، آپ کو خالصتان سے بھی لوگ پسند کرتے ہیں، وہاں کے لوگ بھی بھارت کام کے لیے جاتے ہیں، آپ نے ان کا ذکر کیوں نہیں کیا؟”
سوشل میڈیا پر #BalochistanIsPakistan کا ہیش ٹیگ ٹرینڈ کرنے لگا اور صارفین نے مطالبہ کیا کہ سلمان خان اپنے بیان کی وضاحت یا معذرت پیش کریں۔
اب تک سلمان خان یا ان کی ٹیم کی جانب سے اس معاملے پر کوئی باضابطہ ردِعمل جاری نہیں کیا گیا۔
