ممبئی: بالی وڈ کے معروف اداکار دھرمیندر 89 برس کی عمر میں ممبئی میں انتقال کر گئے۔ ان کے اچانک انتقال کے بعد مداحوں نے سوشل میڈیا پر گہرے دکھ کا اظہار کیا۔
انسٹاگرام پر 2 اکتوبر کو دھرمیندر کی جانب سے ایک ویڈیو پیغام شیئر کیا گیا تھا جو اب دوبارہ وائرل ہو رہا ہے۔ یہ پیغام ہندو تہوار دسہرہ کے موقع پر جاری کیا گیا تھا۔ ویڈیو میں دھرمیندر نے کہا: “تمام بھائی بہنوں، بچے بچیوں کو دسہرہ کی مبارک ہو، خدا آپ سب کو لمبی صحت دے، خوشیاں دے اور اب آپ نیک بن کے رہیں تب تو ترقی ہی ترقی ہے۔”
واضح رہے کہ دھرمیندر چند روز قبل ممبئی کے بریچ کینڈی اسپتال میں داخل تھے۔ بھارتی میڈیا کے مطابق، انہیں دو ہفتے قبل سانس لینے میں دشواری کے باعث اسپتال منتقل کیا گیا تھا اور رواں سال اپریل میں ان کی آنکھ کی سرجری بھی ہوئی تھی۔