لاہور: پنجاب میں فلم انڈسٹری کے فروغ اور جدید تقاضوں سے ہم آہنگ بنانے کے لیے پنجاب فلم ڈویلپمنٹ اتھارٹی کے قیام کا فیصلہ کر لیا گیا ہے۔ اس سلسلے میں پنجاب فلم ڈویلپمنٹ اتھارٹی ایکٹ 2025 پنجاب اسمبلی میں پیش کر دیا گیا ہے۔
یہ بل رواں اجلاس کے دوران بروز جمعہ پیش کیا گیا، جس کے تحت پنجاب فلم ڈویلپمنٹ اتھارٹی قائم کی جائے گی۔ اتھارٹی کے ذریعے فلم سازی، ڈرامہ اور ڈاکیومنٹریز کی سرپرستی کی جائے گی جبکہ نئی فلم پالیسی، قواعد و ضوابط اور لائسنسنگ کا جامع نظام متعارف کرایا جائے گا۔
بل کے مطابق فلم سازوں کو اجازت ناموں، سہولیات اور ون ونڈو آپریشن کی سہولت فراہم کی جائے گی۔ مقامی اور غیر ملکی سرمایہ کاری کے فروغ کے لیے خصوصی مراعات دی جائیں گی، جبکہ فلم اسٹوڈیوز، فلم سٹی اور پوسٹ پروڈکشن سہولیات کے قیام کی راہ بھی ہموار کی جائے گی۔
قانون کے تحت نئے ٹیلنٹ کی تربیت کے لیے باقاعدہ ٹریننگ پروگرامز شروع کیے جائیں گے اور فلم انڈسٹری کے لیے فنڈنگ، گرانٹس اور سبسڈی کا نظام بھی متعارف کرایا جائے گا۔ اس کے ساتھ ساتھ پنجاب کی ثقافت، سیاحت اور مثبت تشخص کو فلم اور میڈیا کے ذریعے اجاگر کرنے پر خصوصی توجہ دی جائے گی۔
بل میں یہ بھی واضح کیا گیا ہے کہ پنجاب فلم ڈویلپمنٹ اتھارٹی فلم انڈسٹری سے متعلق شکایات اور مسائل کے حل کے لیے مجاز ادارہ ہوگی۔
پنجاب اسمبلی نے بل کو دو ماہ کے لیے متعلقہ کمیٹی کے سپرد کر دیا ہے، جو اس مدت کے دوران اپنی رپورٹ پیش کرے گی۔ کمیٹی کی سفارشات کے بعد بل کو دوبارہ پنجاب اسمبلی سے منظور کروایا جائے گا، جبکہ بل کی حتمی منظوری گورنر پنجاب دیں گے۔
حکومتی ذرائع کے مطابق اس قانون سازی سے پنجاب میں فلم انڈسٹری کو نئی زندگی ملے گی اور صوبہ فلم سازی کے ایک اہم مرکز کے طور پر ابھر سکے گا۔