لاہور: ملک اور بیرونِ ملک مداحوں کے لیے خوشخبری ہے کہ معروف صوفی گلوکارہ عابدہ پروین بالکل خیریت سے ہیں۔ سوشل میڈیا پر ان کی وفات کی افواہیں پھیلنے کے بعد گلوکارہ کی بیٹی نے فوری طور پر وضاحت جاری کی ہے۔
بیٹی نے بتایا کہ لاہور کے علاقے دلگران چوک میں ایک خاتون کا انتقال ہوا تھا جس کا نام بھی عابدہ پروین تھا، جس کے باعث یہ غلط فہمی پیدا ہوئی۔ انہوں نے واضح کیا کہ یہ خبریں سرے سے جھوٹی اور بے بنیاد ہیں اور ان کی والدہ صحت مند ہیں۔
بیٹی نے عوام سے اپیل کی کہ وہ صرف مصدقہ اور قابلِ اعتماد ذرائع سے معلومات حاصل کریں اور کسی بھی افواہ پر یقین نہ کریں۔ انہوں نے مزید کہا کہ غیر مصدقہ خبریں پھیلانے سے نہ صرف عوام میں تشویش پیدا ہوتی ہے بلکہ گلوکارہ اور ان کے اہلِ خانہ کی نجی زندگی پر بھی اثر پڑتا ہے۔
واضح رہے کہ عابدہ پروین کی وفات کے جھوٹے دعووں نے ملک بھر میں اور بیرونِ ملک موجود ان کے مداحوں میں شدید تشویش پیدا کی تھی۔ خاندان نے میڈیا اور عوام سے درخواست کی ہے کہ وہ افواہوں پر یقین کرنے اور پھیلانے سے گریز کریں اور لیجنڈری گلوکارہ کا احترام کریں۔
