لاہور: فیفا نے جمعرات کو آئندہ سال ہونے والے فٹبال ورلڈکپ 2026 کے لیے آفیشل میچ بال متعارف کرا دیا۔ یہ گیند جرمن اسپورٹس کمپنی ایڈیڈاس نے ڈیزائن کی ہے اور اس کا نام “TRIONDA” (ٹریونڈا) رکھا گیا ہے۔
ٹریونڈا کا نام دو اسپینش الفاظ سے بنایا گیا ہے:
• “Tri” (تین)
• “Onda” (لہر)
یہ نام تین میزبان ممالک امریکا، میکسیکو اور کینیڈا اور گیند کے لہر نما ڈیزائن کی نمائندگی کرتا ہے۔
ڈیزائن کی خصوصیات
• گیند میں سرخ، نیلا اور سبز رنگ نمایاں ہیں۔
• کینیڈا کی نمائندگی کے لیے میپل کا پتہ، میکسیکو کے لیے عقاب اور امریکا کے لیے ستارہ شامل کیا گیا ہے۔
• گیند پر موجود پیٹرن اتحاد کی علامت ہے۔
جدید ٹیکنالوجی
ورلڈکپ کی آفیشل گیند میں اس بار تاریخ کی سب سے جدید ٹیکنالوجی شامل کی گئی ہے:
• گیند میں پہلی بار کنیکٹڈ بال ٹیکنالوجی نصب کی گئی ہے۔
• اس میں 500Hz موشن سینسر موجود ہے جو ہر حرکت کا ڈیٹا فراہم کرے گا۔
• یہ فیچر ریفریز کو آف سائیڈ اور ہینڈ بال جیسے فیصلے فوری اور درست کرنے میں مدد دے گا۔
فیفا کے مطابق ورلڈکپ 2026 11 جون سے 19 جولائی تک امریکا، میکسیکو اور کینیڈا میں کھیلا جائے گا۔