تل ابیب: اسرائیلی حکومت کی ترجمان شوش بیڈروسیان نے کہا ہے کہ غزہ میں جنگ بندی معاہدے کی توثیق کے بعد 24 گھنٹوں کے اندر جنگ بندی کا نفاذ شروع ہو جائے گا۔
پریس کانفرنس کے دوران ترجمان نے بتایا کہ اسرائیل نے آج صبح مصر میں معاہدے کے حتمی مسودے پر دستخط کر دیے ہیں۔ ان کے مطابق کابینہ کی باضابطہ منظوری کے بعد جنگ بندی نافذ ہو جائے گی۔
بیڈروسیان نے بتایا کہ معاہدے کے تحت جنگ بندی کے نفاذ کے بعد 72 گھنٹوں کی مدت شروع ہوگی، جس کے دوران قیدیوں اور یرغمالیوں کا تبادلہ عمل میں لایا جائے گا۔
ترجمان نے واضح کیا کہ اسرائیلی جیل میں قید معروف فلسطینی سیاسی رہنما مروان برغوثی کی رہائی اس معاہدے کا حصہ نہیں ہے۔
انہوں نے مزید بتایا کہ قیدیوں کے تبادلے کا عمل مکمل ہونے کے بعد اسرائیلی افواج “یلو لائن” کے پیچھے ہٹ جائیں گی، تاہم اسرائیل غزہ کی پٹی کے 53 فیصد علاقے پر اپنا کنٹرول برقرار رکھے گا۔
ذرائع کے مطابق جنگ بندی معاہدے کے مختلف پہلوؤں پر عمل درآمد بین الاقوامی مبصرین کی نگرانی میں کیا جائے گا۔