بیجنگ: چین نے پاکستان اور افغانستان کے درمیان سیز فائر معاہدے کا خیر مقدم کرتے ہوئے کہا ہے کہ دونوں ممالک چین کے دوست اور ہمسایہ ہیں اور امید ہے کہ وہ اپنے مسائل بات چیت اور مشاورت کے ذریعے حل کریں گے۔
چینی وزارت خارجہ کے ترجمان نے بیان جاری کرتے ہوئے کہا:
“چین پاکستان اور افغانستان کے درمیان جنگ بندی معاہدے کا خیر مقدم کرتا ہے۔ معاہدے میں ثالث کا کردار ادا کرنے والے ممالک کا اقدام قابل ستائش ہے۔ امید ہے کہ دونوں ملک اپنے مسائل بات چیت اور مشاورت سے حل کریں گے اور خطے میں جامع و پائیدار امن کے لیے تعاون جاری رکھیں گے۔ چین پاک-افغان تعلقات میں بہتری کے لیے اپنا کردار ادا کرنے کے لیے تیار ہے۔”
دوحا مذاکرات اور سیز فائر
پاکستان اور افغان طالبان کے درمیان مذاکرات 18 اکتوبر کو قطر کے دارالحکومت دوحا میں شروع ہوئے، جس میں پاکستان کے وفد کی قیادت وزیر دفاع خواجہ آصف نے کی جبکہ طالبان وفد کی قیادت ملا یعقوب کر رہے تھے۔
مذاکرات کی کامیابی کے بعد وزیر دفاع خواجہ آصف نے سماجی رابطے کی ویب سائٹ ایکس پر کہا:
“پاکستان اور افغانستان کے مابین سیز فائر کا معاہدہ طے پا گیا ہے۔ پاکستان کی سرزمین پر افغانستان سے دہشت گردی کا سلسلہ فی الفور بند ہوگا اور دونوں ہمسایہ ملک ایک دوسرے کی سرزمین کا احترام کریں گے۔”
یہ معاہدہ خطے میں امن کے فروغ اور پاک-افغان تعلقات میں بہتری کی جانب ایک اہم قدم قرار دیا جا رہا ہے۔
