ریاض: سعودی ولی عہد اور وزیرِ اعظم شہزادہ محمد بن سلمان کی خصوصی دعوت پر وزیرِ اعظم محمد شہباز شریف وفد کے ہمراہ فیوچر انویسٹمنٹ انیشی ایٹیو (FII) کی نویں بین الاقوامی کانفرنس میں شرکت کے لیے ریاض پہنچ گئے۔
وزیرِ اعظم کے وفد کو کنگ خالد انٹرنیشنل ایئرپورٹ پر ریاض کے نائب گورنر شہزادہ محمد بن عبدالرحمن بن عبدالعزیز، سعودی عرب میں پاکستان کے سفیر احمد فاروق اور پاکستان میں سعودی عرب کے سفیر نواف بن سعید المالکی نے خوش آمدید کہا۔
وزیرِ اعظم کے ہمراہ نائب وزیرِ اعظم و وزیرِ خارجہ سینیٹر محمد اسحاق ڈار، وفاقی وزیرِ خزانہ محمد اورنگزیب، وفاقی وزیرِ اطلاعات و نشریات عطاء اللہ تارڑ، اور معاونینِ خصوصی طارق فاطمی و بلال بن ثاقب پر مشتمل ایک اعلیٰ سطحی وفد موجود ہے۔
وزیرِ اعظم محمد شہباز شریف ریاض میں ہونے والی فیوچر انویسٹمنٹ انیشی ایٹیو کانفرنس میں پاکستان کی نمائندگی کریں گے، جہاں وہ عالمی رہنماؤں، سرمایہ کاروں اور بین الاقوامی اداروں کے سربراہان سے ملاقاتیں کریں گے۔
دورے کے دوران وزیرِ اعظم کی سعودی ولی عہد و وزیرِ اعظم شہزادہ محمد بن سلمان سے اہم ملاقات متوقع ہے۔ ملاقات میں پاکستان اور سعودی عرب کے درمیان تجارت، سرمایہ کاری، توانائی اور افرادی قوت کے شعبوں میں تعاون کے فروغ پر بات چیت ہوگی، جبکہ عالمی و علاقائی امور پر بھی تبادلہ خیال کیا جائے گا۔
وزیرِ اعظم کا یہ دورہ پاکستان اور سعودی عرب کے درمیان دوطرفہ تعلقات کو مزید مضبوط بنانے اور اقتصادی و سرمایہ کاری کے نئے مواقع پیدا کرنے کے لیے ایک اہم سنگ میل قرار دیا جا رہا ہے۔
