ریاض: پاکستان اور سعودی عرب نے دوطرفہ اقتصادی تعاون کو فروغ دینے کے لیے ایک نئے اقتصادی تعاون فریم ورک کا آغاز کرنے کا اعلان کیا ہے۔ یہ اعلان ریاض میں وزیراعظم شہباز شریف اور سعودی ولی عہد شہزادہ محمد بن سلمان کی ملاقات کے بعد جاری ہونے والے مشترکہ اعلامیے میں کیا گیا۔
دفترِ خارجہ کے مطابق، دونوں ممالک نے اپنی تاریخی شراکت داری کو مزید مضبوط بنانے اور باہمی تعاون کو نئی بلندیوں تک لے جانے پر اتفاق کیا ہے۔
مشترکہ فریم ورک کے تحت اقتصادی، تجارتی، سرمایہ کاری اور ترقیاتی منصوبوں پر جامع بات چیت کی جائے گی۔ اعلامیے میں بتایا گیا کہ توانائی، صنعت، کان کنی، اطلاعاتی ٹیکنالوجی (آئی ٹی)، سیاحت، زراعت اور فوڈ سکیورٹی کو ترجیحی شعبوں کے طور پر شناخت کیا گیا ہے۔
مزید برآں، دونوں ممالک کے درمیان بجلی کی ترسیل کے منصوبے سے متعلق مفاہمتی یادداشت (MoU) پر دستخط کی تیاری جاری ہے، جبکہ توانائی کے شعبے میں تعاون کے لیے بھی نئی مفاہمتی یادداشت پر کام ہو رہا ہے۔
اعلامیے کے مطابق، پاکستان اور سعودی عرب دونوں ایک پائیدار شراکت داری کے قیام کے خواہاں ہیں۔ قائدین نے اعلیٰ سطح سپریم کوآرڈینیشن کونسل کے آئندہ اجلاس کے جلد انعقاد کی امید ظاہر کی ہے، جس میں اہم اقتصادی منصوبوں پر پیشرفت کا جائزہ لیا جائے گا۔
