برمنگھم: یوروپا لیگ میں انگلش کلب آسٹن ولا اور اسرائیلی فٹبال کلب مکابی تل ابیب کے درمیان وِلا پارک اسٹیڈیم میں ہونے والے میچ کے دوران اسٹیڈیم کے باہر ہزاروں افراد نے فلسطین کے حق میں بھرپور احتجاج کیا۔
غیر ملکی میڈیا کے مطابق مظاہرین نے فلسطینیوں سے اظہار یکجہتی کرتے ہوئے اسرائیلی فٹبال کلبز پر بین الاقوامی مقابلوں میں شرکت پر پابندی کا مطالبہ کیا۔
احتجاج کرنے والوں نے بینرز بھی اٹھا رکھے تھے جن پر لکھا تھا کہ “اسرائیل نے فلسطین میں 400 سے زائد فٹبالرز کو قتل کیا ہے”۔
رپورٹ کے مطابق مظاہرے میں مقامی رکن پارلیمنٹ محمد ایوب نے بھی شرکت کی اور مظاہرین کی آواز میں آواز ملائی۔
شرکا کا کہنا تھا کہ کھیل کو سیاست سے بالاتر سمجھا جاتا ہے، مگر فلسطین میں جاری صورتحال کھیل اور کھلاڑیوں پر بھی براہ راست اثر انداز ہو رہی ہے۔
مظاہرین نے عالمی فٹبال تنظیموں سے مطالبہ کیا کہ وہ اسرائیلی ٹیموں کے خلاف مؤثر کارروائی کریں اور فلسطینی کھلاڑیوں کے لیے انصاف کو یقینی بنایا جائے۔