امریکی صدر ڈونلڈ ٹرمپ کی سعودی ولی عہد سے آئندہ ہفتے ملاقات کی تصدیق

واشنگٹن: امریکی صدر ڈونلڈ ٹرمپ نے اعلان کیا ہے کہ وہ آئندہ ہفتے سعودی ولی عہد محمد بن سلمان سے ملاقات کریں گے، جسے وہ ایک اہم اور ’’صرف ملاقات سے بڑھ کر‘‘ قرار دے رہے ہیں۔

ایئر فورس ون میں صحافیوں سے گفتگو کرتے ہوئے صدر ٹرمپ کا کہنا تھا کہ یہ ملاقات خطے کی صورتِ حال، دفاعی تعاون اور سفارتی امور کے حوالے سے نہایت اہمیت کی حامل ہوگی۔

ایف-35 طیاروں کی ممکنہ فروخت پر گفتگو
ایک سوال کے جواب میں صدر ٹرمپ نے بتایا کہ سعودی عرب امریکی ساختہ جدید جنگی طیاروں کی خریداری میں دلچسپی رکھتا ہے۔ ان کا کہنا تھا: ’’سعودی عرب بڑی تعداد میں ایف-35 سمیت دیگر لڑاکا طیارے خریدنا چاہتا ہے۔ امریکا دنیا کے بہترین طیارے اور میزائل تیار کرتا ہے۔‘‘

ابراہیمی معاہدوں پر پیشرفت
خطے میں امن کے حوالے سے گفتگو کرتے ہوئے صدر ٹرمپ نے کہا کہ ابراہیمی معاہدے بھی ملاقات کے ایجنڈے کا حصہ ہوں گے۔ انہوں نے امید ظاہر کی کہ سعودی عرب جلد اس معاہدے میں شامل ہو جائے گا۔

یہ اہم ملاقات امریکا اور سعودی عرب کے دفاعی و سفارتی تعلقات میں ممکنہ نئے موڑ کا پیش خیمہ سمجھی جا رہی ہے۔