دبئی: دبئی ایئر شو میں پاکستان کے جنگی طیارے جے ایف-17 تھنڈر نے عوام اور بین الاقوامی ایوی ایشن ماہرین کی بھرپور توجہ حاصل کی۔ ایئر شو میں پیش کیے گئے جے ایف-17 کے مختلف ماڈلز کے ساتھ نصب جدید میزائل سسٹمز شرکا کی دل چسپی کا مرکز بنے رہے، جبکہ مختلف ممالک کے دفاعی ماہرین اور فوجی نمائندگان بھی پاکستانی اسٹینڈ پر موجود نظر آئے۔
جے ایف-17 کے اسٹال پر غیر معمولی رش
سبز ہلالی پرچم سے مزین پاکستانی طیاروں کے اردگرد لوگوں کا رش دن بھر برقرار رہا۔ دبئی پولیس کے اہلکاروں نے بھی پاکستانی طیاروں اور پائلٹس کے ساتھ تصاویر بنوائیں، جس سے ایئر شو میں پاکستانی اسٹال کی عوامی رسائی مزید بڑھ گئی۔
ایئر شو میں موجود پاکستانی پائلٹ نے جیو نیوز سے گفتگو میں مسکراتے ہوئے بتایا کہ:
“ہم نے پوری دنیا کو میدانِ جنگ میں اپنی اصل مہارت دکھا دی ہے، اب ایئر شو میں کرتب دکھانے کی چنداں ضرورت نہیں۔”
بھارتی ’تیجاس‘ کی کم عوامی توجہ
ایئر شو کے دوسری جانب بھارتی لائٹ کومبیٹ ایئرکرافٹ ’تیجاس‘ نسبتاً کم توجہ حاصل کرتا دکھائی دیا۔ رپورٹس کے مطابق طیارہ عوامی دلچسپی پیدا کرنے میں ناکام رہا اور اس کے اسٹینڈ کے گرد آنے والوں کی تعداد نہایت کم رہی۔
دفاعی سطح پر پاکستانی اسٹال نمایاں
پاکستانی پویلین پر مختلف ممالک کے دفاعی ماہرین کی موجودگی اس بات کا ثبوت ہے کہ خطے میں دفاعی صنعت کے حوالے سے پاکستان کی پوزیشن مضبوط ہو رہی ہے۔ جے ایف-17 کے مختلف ورژنز، اسلحہ اور میزائل سسٹمز نے ایئر شو میں پیشہ ور حلقوں کی خاص توجہ حاصل کی۔
