دبئی: دبئی ایئر شو کے دوران بھارت کا مقامی طور پر تیار کردہ جنگی طیارہ تیجس ایروبیٹک مظاہرے کے دوران گر کر تباہ ہوگیا، جس کے نتیجے میں طیارے کا پائلٹ بھی ہلاک ہوگیا۔
بھارتی ایئر فورس نے حادثے کی تصدیق کرتے ہوئے کہا کہ دبئی ایئر شو میں تیجس طیارہ دورانِ پرواز تکنیکی مسئلے یا کسی ممکنہ انسانی غلطی کے باعث کریش ہوا۔ حادثہ دوپہر 2 بج کر 10 منٹ پر پیش آیا جب طیارہ ایروبیٹک اسٹنٹ دکھا رہا تھا۔
امریکی میڈیا رپورٹس کے مطابق طیارہ تیز رفتار اسٹنٹ کے دوران توازن برقرار نہ رکھ سکا اور چند ہی سیکنڈ میں زمین سے ٹکرا کر تباہ ہوگیا۔ دبئی ایئر شو میں شائقین کی بڑی تعداد اس وقت ایونٹ دیکھ رہی تھی، تاہم حادثے کے فوراً بعد لڑاکا طیاروں کا ایروبیٹک سیشن روک دیا گیا۔
بھارتی میڈیا کے مطابق پائلٹ کی شناخت اور حادثے کی اصل وجہ جاننے کے لیے تحقیقات جاری ہیں۔ حکام اس بات کا جائزہ لے رہے ہیں کہ طیارہ انجن کی خرابی، تکنیکی نقص یا پائلٹ کی غلطی کے باعث حادثے کا شکار ہوا۔
طیارے کی تاریخ اور حالیہ مسائل
• تباہ ہونے والا تیجس طیارہ 2016 سے سروس میں تھا۔
• یہ واقعہ دو سال سے بھی کم عرصے میں تیجس کا دوسرا بڑا حادثہ ہے۔
• اس سے قبل مارچ 2024 میں تیجس طیارہ راجستھان کے شہر جیسلمیر میں گر کر تباہ ہوا تھا۔
• چند روز قبل دبئی ایئر شو کے دوران سامنے آنے والی ایک ویڈیو میں طیارے کے فیول ٹینک سے تیل لیک ہوتا بھی دیکھا گیا تھا۔
• تیجس کی پہلی آزمائشی پرواز 2001 میں کی گئی تھی۔
دبئی ایئر شو کی تاریخ میں یہ پہلا موقع ہے کہ کوئی جنگی طیارہ مظاہرے کے دوران گر کر تباہ ہوا ہو۔ انتظامیہ نے حادثے کے بعد صورتحال معمول پر لانے کے لیے حفاظتی اقدامات مزید سخت کر دیے ہیں۔
