لندن: آکسفورڈ یونین کے تصدیق شدہ مباحثے میں بھارتی وفد کے اچانک دستبردار ہونے کے بعد پاکستان نے بلامقابلہ کامیابی حاصل کرلی۔
پاکستان ہائی کمیشن لندن کے مطابق مباحثہ بھارت کی پاکستان پالیسی اور عوامی جذبات بھڑکانے کی حکمتِ عملی سے متعلق تھا، جس میں بھارتی وفد کی عدم شرکت نے ان کے مؤقف کی کمزوری کو بے نقاب کردیا۔
اعلامیے میں بتایا گیا کہ مباحثے میں پاکستان کی نمائندگی جنرل (ر) زبیر محمود حیات اور سابق وزیر خارجہ حناربانی کھر نے کی، جب کہ پاکستانی ہائی کمشنر ڈاکٹر محمد فیصل بھی خصوصی طور پر لندن پہنچے تھے۔
ہائی کمیشن کے مطابق بھارتی مقررین “حاضری کی ہمت” نہ کرسکے اور عین وقت پر بحث چھوڑ کر چلے گئے۔
بیان میں کہا گیا کہ:
“بھارتی وفد نے اسی بحث سے راہِ فرار اختیار کی۔ آکسفورڈ یونین جیسے غیر جانبدار فورم پر بھارتی بیانیے کی کمزوری کھل کر سامنے آگئی۔”
پاکستان ہائی کمیشن کا کہنا تھا کہ بھارت کے نام نہاد تجزیہ کار جو میڈیا پر پاکستان مخالف پروپیگنڈا کرتے ہیں، علمی مباحثے میں دلیل دینے سے گھبرا گئے۔
اعلامیے کے مطابق پاکستان نے مباحثے کی بھرپور تیاری کی تھی اور دلیل، مکالمے اور قانونی موقف کے ساتھ شرکت کے لیے مکمل تیار تھا، مگر بھارت نے بحث شروع ہونے سے پہلے ہی “ہتھیار ڈال دیے”۔
پاکستان ہائی کمیشن نے مزید کہا کہ آکسفورڈ یونین میں بھارتی وفد کی عدم شرکت ان کے اپنے عوام کے سامنے بھی ایک بڑا سوالیہ نشان بن گئی.
