ہانگ کانگ: شہر کے شمالی حصے میں واقع ایک کثیرالمنزلہ رہائشی کمپلیکس میں رات گئے لگنے والی آگ نے بڑے پیمانے پر تباہی مچادی، جس کے نتیجے میں ہلاکتوں کی تعداد 65 تک پہنچ گئی۔
بین الاقوامی خبر ایجنسی کے مطابق 51 افراد موقع پر ہی جھلس کر ہلاک ہوگئے جب کہ مزید افراد اسپتال میں زخموں کی تاب نہ لاتے ہوئے دم توڑ گئے۔ حکام کے مطابق ہلاکتوں میں اضافے کا خدشہ ہے۔
ہانگ کانگ فائر سروس کے مطابق رہائشی کمپلیکس کے 8 میں سے 4 بلاکس میں لگی آگ پر قابو پالیا گیا ہے، جب کہ دیگر بلاکس میں آگ بجھانے کا کام مسلسل جاری ہے۔ ایک بلاک کو آگ نے متاثر نہیں کیا۔
ریسکیو ٹیمیں عمارت کے مختلف حصوں میں پھنسے افراد کی تلاش اور محفوظ انخلا میں مصروف ہیں۔ حکام نے آگ لگنے کی وجہ جاننے کے لیے تحقیقات کا آغاز کردیا ہے۔
یہ واقعہ ہانگ کانگ کی حالیہ تاریخ کے بدترین آتشزدگی کے واقعات میں سے ایک قرار دیا جارہا ہے.
