غزہ/قاہرہ: مصر نے غزہ میں قیامِ امن اور سکیورٹی کی بحالی کے لیے فلسطینی اہلکاروں کی بڑے پیمانے پر تربیت شروع کر دی ہے۔ اس منصوبے کے تحت مستقبل میں غزہ کے لیے ایک نئی سکیورٹی فورس تشکیل دی جائے گی، جس کے تمام ارکان کا تعلق غزہ پٹی سے ہوگا۔
مصری وزیر خارجہ بدر عبدالعاطی نے گزشتہ ماہ فلسطینی وزیر اعظم محمد مصطفیٰ کے ساتھ مذاکرات میں اعلان کیا تھا کہ 5000 فلسطینی پولیس افسران اور اہلکاروں کو تربیت دینے کا جامع منصوبہ تیار کیا گیا ہے۔
فلسطینی حکام کے مطابق پہلا گروپ مارچ میں 500 سے زائد اہلکاروں پر مشتمل تھا، جس نے قاہرہ میں ٹریننگ مکمل کی۔ ستمبر سے دو ماہ کے نئے تربیتی کورسز بھی شروع ہو چکے ہیں جن میں مزید سیکڑوں فلسطینی افسران شامل ہو رہے ہیں۔ ذرائع کے مطابق نئی فورس کی تنخواہیں فلسطینی اتھارٹی ادا کرے گی۔
ایک 26 سالہ فلسطینی پولیس اہلکار نے ٹریننگ پر خوشی کا اظہار کرتے ہوئے کہا کہ وہ غزہ میں مستقل امن اور جنگ کے خاتمے کے لیے پُرجوش ہیں۔ ان کا کہنا تھا کہ وہ چاہتے ہیں کہ نئی فورس آزاد اور صرف فلسطین کی وفادار ہو، نہ کہ کسی بیرونی اتحاد کے زیر اثر۔
ایک فلسطینی لیفٹیننٹ کے مطابق انہیں سرحدی نگرانی کیلئے جدید آلات کے ساتھ عملی تربیت فراہم کی گئی ہے۔ ٹریننگ کے دوران فلسطینی لبریشن آرگنائزیشن (PLO) کے بطور واحد جائز نمائندہ کردار پر بھی زور دیا گیا، جبکہ ایک مکمل خودمختار فلسطینی ریاست کے قیام کے وژن کو مرکزی حیثیت دی گئی۔
فلسطینی اتھارٹی کے ایک اعلیٰ سکیورٹی اہلکار نے تصدیق کی کہ صدر محمود عباس نے وزیر داخلہ زیاد حبّ الرح کو مصر کے ساتھ تمام تربیتی امور کے انتظامات کی نگرانی کی ہدایت دی ہے۔
گزشتہ سال مصر کی میزبانی میں ہونے والے مذاکرات میں فلسطینی دھڑوں—جن میں حماس اور فتح شامل ہیں—نے 10 ہزار پولیس اہلکاروں پر مشتمل مشترکہ فورس تشکیل دینے پر اتفاق کیا تھا۔ معاہدے کے مطابق 5000 اہلکاروں کو مصر تربیت دے گا جبکہ بقیہ 5000 اہلکار غزہ کی موجودہ پولیس فورس سے لیے جائیں گے، جو 2007 سے حماس کے کنٹرول میں ہے.