منامہ: بحرین نے غیر ملکیوں کے لیے رہائش کے قواعد مزید آسان بناتے ہوئے گولڈن ویزا کے لیے کم از کم سرمایہ کاری کی شرط میں 35 فیصد کمی کر دی ہے، جس کے بعد مملکت میں مستقل قیام حاصل کرنا پہلے سے کہیں زیادہ سہل ہو گیا ہے۔
میڈیا رپورٹس کے مطابق بحرین کی وزارتِ داخلہ کے قومی شہریت، پاسپورٹس اور رہائشی امور نے اعلان کیا ہے کہ گولڈن ویزا کیلئے سرمایہ کاری کی حد 2 لاکھ بحرینی دینار سے کم کر کے 1 لاکھ 30 ہزار دینار کر دی گئی ہے۔
اس کے علاوہ وہ افراد جو پہلے ہی 130000 دینار مالیت کی جائیداد کے مالک ہیں، اب اس پروگرام کے لیے براہ راست اہل قرار پائیں گے۔
گولڈن ریزیڈنسی ویزا متعدد کیٹیگریز کے افراد کے لیے کھولا گیا ہے، جن میں شامل ہیں:
• رئیل اسٹیٹ میں سرمایہ کار
• وہ پیشہ ور افراد جن کی ماہانہ آمدنی کم از کم 2000 بحرینی دینار ہو
• ریٹائرڈ افراد جو کم از کم 15 سال بحرین میں کام کر چکے ہوں
• غیر مقیم ریٹائرز جن کی ماہانہ پنشن 4000 دینار یا اس سے زیادہ ہو
• وہ باصلاحیت افراد جو بحرینی معیشت میں اہم کردار ادا کر رہے ہوں
درخواست دہندگان کو وزارت کے آن لائن پورٹل کے ذریعے اپلائی کرنا ہوگا، جس کے لیے درست پاسپورٹ، گزشتہ 6 ماہ کی بینک اسٹیٹمنٹ, صحت کی انشورنس، اور رہائش کا ثبوت لازمی قرار دیا گیا ہے۔
درخواست فیس 5 بحرینی دینار جبکہ ویزا کے اجرا کی فیس 300 دینار مقرر ہے۔
گولڈن ویزا ہولڈرز کو متعدد سہولتیں حاصل ہوں گی، جن میں بحرین میں کہیں بھی کام کرنے کی اجازت، ملک میں غیر محدود داخلہ و خروج کی سہولت، اپنے زیرِ کفالت افراد کی کفالت، اور کاروبار کی مکمل ملکیت کے حقوق شامل ہیں.