برطانوی دفاعی جریدے نے مئی میں ہونے والی پاک بھارت جنگ کے دوران تباہ ہونے والے بھارتی رافیل طیاروں کے سیریل نمبرز منظرِ عام پر لا دیے ہیں۔
برطانوی دفاعی میگزین کی ایرو (Key_Aero) کی تحقیقی رپورٹ کے مطابق پاکستان اور بھارت کے درمیان مئی میں ہونے والی 52 منٹ طویل فضائی جھڑپ کے دوران بھارتی فضائیہ کے چار رافیل لڑاکا طیارے تباہ ہوئے۔
رپورٹ میں ان تباہ ہونے والے رافیل طیاروں کے نمبرز BS-001، BS-021، BS-022 اور BS-027 بتائے گئے ہیں۔ جریدے کے مطابق بھارت ان چاروں طیاروں کے سیریل نمبرز کے ساتھ کوئی واضح یا مستند تصاویر پیش کرنے میں ناکام رہا ہے۔
رپورٹ میں کہا گیا ہے کہ پاکستان کے ملٹی ڈومین آپریشنز کے باعث بھارتی فضائیہ کو شدید نقصان اٹھانا پڑا اور اسے عملی طور پر مفلوج کر دیا گیا۔ بھارتی فضائیہ کے مجموعی نقصانات میں چار رافیل طیاروں کے علاوہ مگ 29، ایس یو 30 اور ہیرون ڈرون کی تباہی بھی شامل ہے۔
برطانوی جریدے کے مطابق 10 مئی کو پاکستانی فضائیہ کے جے ایف 17 سی بلاک 3 طیارے نے ادھم پور میں نصب بھارتی فضائی دفاعی نظام ایس 400 کو نشانہ بنا کر تباہ کیا، جبکہ برنالا میں بھارتی کمانڈ اینڈ کنٹرول سسٹم بھی پاکستانی کارروائی کا نشانہ بنا۔
رپورٹ میں مزید انکشاف کیا گیا ہے کہ پاکستانی سائبر یونٹس نے بھارت کے تقریباً 96 فیصد سوشل نیٹ ورکس اور ڈیجیٹل نظام کو مفلوج کر دیا۔ رپورٹ کے مطابق یہ تاریخ میں پہلی بار ہوا کہ کسی فضائیہ نے سائبر اور روایتی عسکری صلاحیتوں کو یکجا کرکے مؤثر کارروائی کی۔
برطانوی جریدے کا کہنا ہے کہ بھارتی چیف آف ڈیفنس اسٹاف جنرل انیل چوہان نے ایک انٹرویو میں بھارتی طیاروں کی تباہی کو تسلیم بھی کیا تھا۔ رپورٹ میں یہ بھی یاد دلایا گیا ہے کہ اس سے قبل 2019 میں پاکستانی فضائیہ نے آپریشن سوئفٹ ریٹارٹ کے دوران بھارتی مگ 21 طیارہ مار گرایا تھا۔
رپورٹ کے بعد خطے کی سکیورٹی صورتحال اور بھارتی فضائیہ کی دفاعی صلاحیتوں پر ایک بار پھر سوالات اٹھنے لگے ہیں.
