پونے: بھارت کی ریاست مہاراشٹرا کے شہر پونے میں میونسپل انتخابات میں ابھی تین ہفتے باقی ہیں، تاہم امیدواروں کے درمیان ووٹ حاصل کرنے کی دوڑ میں انتخابی سرگرمیاں عروج پر پہنچ گئی ہیں۔
بھارتی میڈیا کے مطابق میونسپل انتخابات میں حصہ لینے والے امیدوار ووٹروں کو لبھانے کے لیے مفت تحائف اور مختلف مراعات کی پیشکش کر رہے ہیں۔ رپورٹس کے مطابق ووٹ کے بدلے ووٹرز کو غیر ملکی دورے، مہنگی گاڑیاں، زیورات اور گھریلو خواتین کے لیے قیمتی ساڑھیاں دینے کے اعلانات کیے جا رہے ہیں۔
ایک امیدوار نے لکی ڈرا کے ذریعے 11 ووٹروں کو 1,100 مربع فٹ زمین دینے کا وعدہ کیا ہے، جس کے لیے باقاعدہ رجسٹریشن کا عمل بھی شروع کر دیا گیا ہے۔ وِمان نگر کے ایک امیدوار نے ووٹ کے بدلے شادی شدہ جوڑوں کے لیے تھائی لینڈ کے پانچ روزہ لگژری ٹور کا اعلان کیا ہے۔
اس کے علاوہ دیگر وارڈز میں بھی لکی ڈراز کے ذریعے مہنگی گاڑیاں، موٹر سائیکلیں اور سونے کے زیورات دینے کی پیشکش کی جا رہی ہے۔ خواتین ووٹرز کو خصوصی طور پر متوجہ کرنے کے لیے مہنگی ساڑھیاں پہلے ہی تقسیم کی جا چکی ہیں، جبکہ سلائی مشینیں اور سائیکلیں بھی فراہم کی گئی ہیں۔
بھارتی میڈیا کے مطابق کھیلوں کے شوقین ووٹروں کو راغب کرنے کے لیے کرکٹ لیگز کا بھی انعقاد کیا گیا ہے، جن میں ایک لاکھ روپے تک کے نقد انعامات رکھے گئے ہیں۔
واضح رہے کہ پونے کے میونسپل انتخابات 15 جنوری کو منعقد ہوں گے۔
