بشکیک: وسطی ایشیائی ملک کرغیزستان نے غیر ملکی شہریوں کے لیے ویزا فری قیام کے قوانین میں تبدیلی کر دی ہے۔ کرغیزستان کی وزارتِ خارجہ نے کابینہ کے 31 دسمبر 2025 کو منظور شدہ فیصلے کے نفاذ کا باضابطہ اعلان کر دیا ہے۔
غیر ملکی میڈیا کے مطابق اس فیصلے کا مقصد مائیگریشن کے عمل کو مزید بہتر اور منظم بنانا، غیر ملکی شہریوں کے قیام کی شرائط میں شفافیت لانا اور ملکی قوانین کو کرغیزستان کی ریاستی مائیگریشن پالیسی کے کلیدی اہداف سے ہم آہنگ کرنا ہے۔
نئے ضوابط کے تحت غیر ملکی شہری اب کرغیزستان میں ہر بار 30 دن تک بغیر ویزا اور بغیر رہائشی اجازت نامے کے داخل ہو سکیں گے۔ قیام کی یہ مدت ملک میں آمد کی تاریخ سے شمار کی جائے گی۔
30 دن مکمل ہونے کے بعد غیر ملکی شہریوں کو یا تو کرغیزستان کی حدود سے باہر جانا ہوگا یا ملکی قوانین کے مطابق متعلقہ دستاویزات حاصل کرنا ہوں گی، جن میں ویزا، مستقل یا عارضی رہائشی اجازت نامہ یا دیگر قانونی اجازت نامے شامل ہیں۔
وزارتِ خارجہ کے مطابق یہ تبدیلیاں ان بین الاقوامی معاہدوں پر اثر انداز نہیں ہوں گی جن کے تحت داخلے یا قیام کی مختلف شرائط طے کی گئی ہیں۔ اس کے علاوہ یہ قوانین ان افراد پر لاگو نہیں ہوں گے جو ملازمت، تعلیم یا دیگر ایسی سرگرمیوں کے لیے ملک میں داخل ہوتے ہیں جن کے لیے خصوصی اجازت نامے درکار ہوتے ہیں۔
کرغیزستان کی وزارتِ خارجہ نے غیر ملکی شہریوں اور ان کی میزبانی کرنے والے افراد و اداروں پر زور دیا ہے کہ وہ قیام کی مقررہ مدت کی سختی سے پابندی کریں اور سفر کی منصوبہ بندی کرتے وقت نئے ضوابط کو مدنظر رکھیں تاکہ مائیگریشن قوانین کی خلاف ورزی سے بچا جا سکے۔
