جھارکھنڈ: بھارت میں ایک غیر معمولی واقعے میں جھارکھنڈ کی عدالت نے منشیات اسمگلنگ کے مقدمے میں گرفتار ملزم کو بری کر دیا کیونکہ ثبوت کے طور پر رکھی گئی 200 کلو چرس چوہوں کے باعث تباہ ہو گئی تھی۔
بھارتی میڈیا کے مطابق مقدمہ 2022 میں درج کیا گیا تھا جب جھارکھنڈ پولیس نے ایک گاڑی کو روک کر بھاری مقدار میں چھپائی گئی چرس برآمد کرنے کا دعویٰ کیا تھا۔ تاہم عدالت کے مطابق پولیس اس چرس کو بطور ثبوت پیش کرنے میں ناکام رہی کیونکہ اسے گودام میں چوہوں نے کھا لیا۔
عدالت نے مقدمے کی سماعت کے دوران کئی تضادات کی نشاندہی کی، جیسے کہ گرفتاری کا وقت اور مقام، ملزم کو کس نے پکڑا، اور مبینہ ساتھی کیسے فرار ہوئے۔ عدالت نے یہ بھی نوٹ کیا کہ واقعے کے مقام کے آس پاس کئی رہائشی علاقے موجود تھے لیکن کسی آزاد شہری کو گواہی کے لیے پیش نہیں کیا گیا۔
حتمی فیصلے میں عدالت نے کہا کہ جب کوئی مادی ثبوت باقی نہیں رہا، تو شک کا فائدہ ملزم کو دیا جانا چاہیے۔ نتیجتاً مرکزی ملزم کو تمام الزامات سے بری کر دیا گیا۔
یہ واقعہ بھارتی عدالتی نظام میں ثبوت کی حفاظت کی اہمیت اور غیر معمولی حالات میں انصاف کے اطلاق کی ایک دلچسپ مثال کے طور پر سامنے آیا ہے۔