میرٹھ: بھارت کے مشہور یوٹیوبر شاداب جکاتی ایک بار پھر تنازعے میں آ گئے ہیں، جب معاملہ اس حد تک پہنچ گیا کہ ویڈیوز میں کام کرنے والی خاتون کے شوہر نے تھانے جا کر اپنی بیوی اور شاداب جکاتی کے خلاف سنگین الزامات عائد کیے۔
میڈیا رپورٹس کے مطابق واقعہ میرٹھ کے انچولی تھانہ علاقہ کا ہے، جہاں شاداب جکاتی یوٹیوب کے لیے مختلف ویڈیوز تخلیق کرتے ہیں اور ان میں ایک خاتون بھی باقاعدگی سے دکھائی دیتی ہے۔
خاتون کے شوہر، خورشید عرف سونو، نے تھانے میں بتایا کہ ان کی بیوی انہیں مارنے کی کوشش کرتی ہیں اور شاداب جکاتی کے کہنے پر کئی دن کے لیے گھر سے غائب ہو جاتی ہیں۔ خورشید نے پولیس کے سامنے اپنی اور اپنے بچوں کی جان کو خطرے میں قرار دیتے ہوئے تحفظ کی اپیل کی۔ ان کا کہنا تھا کہ “میری بیوی کے شادی کے بعد کئی لوگوں سے تعلقات رہے، اب یہ شاداب کے ساتھ مجھے نقصان پہنچانے کی کوشش کر رہی ہے۔”
یہ ویڈیو تھانے کے اندر اور باہر ریکارڈ ہو کر سوشل میڈیا پر وائرل ہو گئی، جس میں خورشید بار بار اپنی جان کو خطرے میں بتاتے ہوئے مدد کی درخواست کرتے نظر آئے۔
دوسری جانب خاتون، ایرم، نے اپنی ویڈیو میں شوہر کے تمام الزامات کو جھوٹا اور من گھڑت قرار دیا۔ ایرم نے کہا کہ وہ شاداب جکاتی کے ساتھ صرف کام کرتی ہیں اور اس کے بدلے انہیں تنخواہ ملتی ہے۔ انہوں نے دعویٰ کیا کہ ان کے شوہر انہیں مارپیٹ اور مالی مطالبات کرتے رہے، اور اب وہ قانونی طور پر طلاق حاصل کرنا چاہتی ہیں۔ ایرم نے مزید کہا کہ وہ چار بچوں کی ماں ہیں اور بچوں کا پیٹ پالنے کے لیے اپنی مرضی سے کام کر رہی ہیں۔
یہ معاملہ اب قانونی اور سوشل میڈیا سطح پر سنجیدہ بحث کا مرکز بن گیا ہے، اور ناظرین اور مداح تنازعے کی آگاہی حاصل کرنے کے لیے ویڈیوز دیکھتے رہتے ہیں۔
