امریکا کی جانب سے ایران کے ساتھ تجارت کرنے والے ممالک پر نئی پابندیاں عائد کیے جانے کے بعد چین کا سخت ردعمل سامنے آگیا ہے۔ واشنگٹن میں قائم چینی سفارتخانے نے امریکی اقدام کو یکطرفہ اور غیرقانونی قرار دیتے ہوئے اس کی کھل کر مخالفت کی ہے۔
چینی سفارتخانے کے ترجمان نے جاری بیان میں کہا کہ ٹیرف کے بے ترتیب اور سیاسی بنیادوں پر نفاذ کے خلاف چین کا مؤقف ہمیشہ واضح، مستقل اور اصولی رہا ہے۔ ان کا کہنا تھا کہ تجارتی محصولات اور معاشی دباؤ عالمی تجارت کے لیے نقصان دہ ہیں اور اس طرزِ عمل سے کسی بھی فریق کو فائدہ نہیں پہنچتا۔
ترجمان نے واضح کیا کہ ٹیرف اور تجارتی جنگوں میں کوئی فاتح نہیں ہوتا اور دباؤ، دھمکی یا زبردستی کے ذریعے پیچیدہ بین الاقوامی مسائل حل نہیں کیے جا سکتے۔ ان کے مطابق امریکا کا یہ طرزِ عمل عالمی اقتصادی نظام کو عدم استحکام سے دوچار کر رہا ہے۔
بیان میں کہا گیا کہ چین بین الاقوامی قوانین اور اقوام متحدہ کے چارٹر کے تحت اپنے جائز معاشی اور تجارتی مفادات کے تحفظ کا حق رکھتا ہے، اور اس مقصد کے لیے تمام ضروری اور مناسب اقدامات اٹھائے گا۔
چینی سفارتخانے کے ترجمان نے مزید کہا کہ چین کسی بھی قسم کی غیرقانونی، یکطرفہ پابندیوں اور دیگر ممالک پر اپنے قوانین کے دائرۂ اختیار کے ناجائز اطلاق کی سخت مخالفت کرتا ہے۔ ان کے بقول ایسے اقدامات نہ صرف عالمی تعاون کو نقصان پہنچاتے ہیں بلکہ عالمی معیشت میں تقسیم اور بے یقینی کو بھی فروغ دیتے ہیں۔
بین الاقوامی امور کے ماہرین کے مطابق چین کے اس ردعمل سے واضح ہوتا ہے کہ امریکا اور چین کے درمیان تجارتی اور سفارتی کشیدگی مزید بڑھ سکتی ہے، جبکہ ایران سے متعلق پابندیوں کا معاملہ عالمی سطح پر نئے تنازعات کو جنم دے سکتا ہے۔