لیبیا : زاویہ کے قریب مارسادیلا بندرگاہ کے پاس پاکستانی شہریوں کی کشتی الٹ گئی، ڈوبنے والی کشتی پر 65 مسافر سوار تھے۔
تفصیلات کے مطابق لیبیا کے ساحل کے قریب پاکستانی شہریوں کی کشتی ڈوبنے کا ایک اور واقعہ سامنے آیا۔
دفترخارجہ کے ترجمان نے بتایا کہ لیبیا میں شمال مغربی شہرزاویہ کے قریب مارسادیلا بندرگاہ کے پاس کشتی الٹ گئی ہے۔
ترجمان کا کہنا تھا کہ پاکستانی سفارت خانے کے مطابق ڈوبنے والی کشتی پر 65 مسافر سوار تھے تاہم طرابلس میں پاکستانی سفارتخانے نے لاشوں کی شناخت کیلئے ٹیم زاویہ اسپتال روانہ کردی ہے۔
ترجمان نے بتایا کہ پاکستانی سفارتخانہ متاثرہ پاکستانیوں کی تفصیلات لینےکی بھی کوشش کر رہا ہے، وزارت خارجہ کا کرائسز مینجمنٹ یونٹ صورتحال کی نگرانی کے لیے فعال کر دیا گیا ہے۔
خیال رہے کہ لیبیا غیر قانونی تارکین کے یورپ جانے کا ایک اہم سمندری راستہ ہے، اس دوران کشتیاں الٹنے سے اب تک سینکڑوں افراد اپنی جان سے ہاتھ دھو بیٹھے ہیں۔