اسلام آباد: سیکیورٹی فورسز نے خیبر پختونخوا کے ضلع مہمند میں فتنہ الخوارج کی پاکستان میں دراندازی کی کوشش ناکام بناتے ہوئے 45 سے 50 دہشتگردوں کو ہلاک کر دیا۔
ذرائع کے مطابق یہ کارروائی خفیہ اطلاعات کی بنیاد پر کی گئی جس میں پاک فوج نے دہشتگردوں کی ایک بڑی تشکیل کو نشانہ بنایا۔
خفیہ اطلاعات پر مبنی کامیاب کارروائی
سیکیورٹی ذرائع کے مطابق آپریشن کے دوران خوارج کے متعدد ٹھکانے تباہ کیے گئے جبکہ کئی دہشتگرد زخمی بھی ہوئے۔
علاقے کو پاک فوج نے مکمل طور پر گھیرے میں لے رکھا ہے اور کلیئرنس آپریشن تاحال جاری ہے۔
ذرائع کا کہنا ہے کہ فائرنگ کا تبادلہ کئی گھنٹوں سے جاری ہے۔
خوارج نے سیزفائر کا ناجائز فائدہ اٹھایا
سیکیورٹی حکام کا کہنا ہے کہ فتنہ الخوارج نے گزشتہ روز اعلان کردہ سیزفائر کا فائدہ اٹھا کر پاکستان میں دراندازی کی کوشش کی، تاہم پاک فوج نے بروقت کارروائی کر کے منصوبہ ناکام بنا دیا۔
حالیہ دنوں میں دہشتگردوں کے خلاف کامیاب کارروائیاں
اس سے قبل 13 تا 15 اکتوبر کے دوران خیبرپختونخوا کے مختلف علاقوں میں سیکیورٹی فورسز کے آپریشنز میں 34 دہشتگرد مارے گئے تھے۔
آئی ایس پی آر کے مطابق یہ کارروائیاں دہشتگردوں کے ٹھکانوں کے خلاف کی گئیں جن میں متعدد دہشتگرد ہلاک اور ان کا اسلحہ و بارود بھی ضبط کیا گیا۔
افغانستان میں کارروائیوں کے بعد سیزفائر
یاد رہے کہ گزشتہ روز افغانستان میں طالبان اور فتنہ الخوارج کے ٹھکانوں پر پاکستان کی ٹارگٹڈ کارروائیوں میں متعدد دہشتگرد مارے گئے تھے۔
ان کارروائیوں کے بعد افغان طالبان کی درخواست پر شام 6 بجے سے 48 گھنٹوں کے لیے عارضی سیزفائر کا فیصلہ کیا گیا تھا۔
سیکیورٹی فورسز کا عزم
سیکیورٹی ذرائع نے اس عزم کا اعادہ کیا ہے کہ دہشتگردوں کے مکمل خاتمے تک کارروائیاں جاری رہیں گی اور ملک کے امن و استحکام کے لیے کسی بھی قربانی سے دریغ نہیں کیا جائے گا۔