کوئٹہ: بلوچستان میں سیکیورٹی فورسز کی انٹیلی جنس بیسڈ کارروائیوں کے دوران بھارتی حمایت یافتہ تنظیم فتنہ الہندوستان سے تعلق رکھنے والے 18 دہشت گرد مارے گئے۔
پاک فوج کے شعبہ تعلقاتِ عامہ (آئی ایس پی آر) کے مطابق 28 اور 29 اکتوبر کو کوئٹہ اور بلیدہ کے علاقوں میں دو الگ الگ آپریشنز کیے گئے، جن میں دہشت گردوں کے ٹھکانے مؤثر طریقے سے نشانہ بنائے گئے۔
آئی ایس پی آر کے بیان کے مطابق کوئٹہ کے علاقے چلتن کی پہاڑیوں میں دہشت گردوں کی موجودگی کی اطلاع پر انٹیلی جنس بیسڈ آپریشن کیا گیا، جس دوران شدید فائرنگ کے تبادلے کے نتیجے میں 14 دہشت گرد ہلاک ہوئے۔
دوسری کارروائی میں ضلع کیچ کے علاقے بلیدہ میں دہشت گردوں کے ایک اور ٹھکانے کو نشانہ بنایا گیا، جس کے دوران 4 دہشت گرد مارے گئے۔
ترجمان کے مطابق ہلاک دہشت گردوں سے بھاری مقدار میں اسلحہ، گولہ بارود اور دھماکہ خیز مواد برآمد کیا گیا۔ یہ دہشت گرد متعدد دہشت گردانہ کارروائیوں میں ملوث تھے اور بھارتی حمایت یافتہ تنظیم فتنہ الہندوستان سے منسلک تھے۔
آئی ایس پی آر نے مزید بتایا کہ علاقے میں کلیئرنس آپریشن جاری ہے تاکہ کسی بھی ممکنہ دہشت گرد کو ختم کیا جا سکے۔
ترجمان کے مطابق سیکیورٹی فورسز اور قانون نافذ کرنے والے ادارے وژن “عزمِ استحکام” کے تحت انسدادِ دہشت گردی مہم بھرپور انداز میں جاری رکھیں گے۔
