جنوبی وزیرستان: سکیورٹی فورسز نے کیڈٹ کالج وانا پر ہونے والے دہشت گرد حملے کی کوشش ناکام بنادی۔ آئی ایس پی آر کے مطابق دہشت گردوں نے بھارتی سرپرستی میں کیڈٹ کالج کو نشانہ بنانے کی کوشش کی، تاہم فورسز نے بروقت کارروائی کرتے ہوئے حملہ ناکام بنایا۔
ترجمان پاک فوج کے مطابق حملہ آوروں نے ابتدا میں کالج کی سکیورٹی توڑنے کی کوشش کی اور ناکامی پر مرکزی گیٹ پر بارودی مواد سے لدی گاڑی ٹکرادی، جس کے نتیجے میں گیٹ اور قریبی عمارت کو نقصان پہنچا۔ فورسز کی جوابی کارروائی میں دو دہشت گرد مارے گئے جبکہ تین دہشت گرد کالج کے ایڈمنسٹریٹو بلاک میں محصور ہیں۔
آئی ایس پی آر نے بتایا کہ محصور دہشت گرد افغانستان میں موجود اپنے ہینڈلرز سے رابطے میں ہیں اور حملے کا مقصد اے پی ایس پشاور حملے جیسی دہشت گردی دہرانا تھا۔ ترجمان کے مطابق دہشت گرد نوجوانوں میں خوف و ہراس پھیلانا چاہتے ہیں، تاہم سکیورٹی فورسز عزم و حوصلے کے ساتھ کارروائی جاری رکھے ہوئے ہیں۔
آئی ایس پی آر کا کہنا ہے کہ افغانستان میں دہشت گرد گروہوں کی موجودگی وہاں کی عبوری حکومت کے دعوؤں کے برعکس ہے اور پاکستان دہشت گردوں اور ان کی سرپرستی کرنے والے عناصر کے خلاف جواب دینے کا حق محفوظ رکھتا ہے۔
ترجمان نے مزید کہا کہ ملک بھر میں “عزمِ استحکام” کے تحت انسدادِ دہشت گردی کی کارروائیاں بلا تعطل جاری رہیں گی اور بیرونی حمایت یافتہ دہشت گردی کا مکمل خاتمہ کیا جائے گا۔
