وانا: خیبرپختونخوا کے شمالی وزیرستان میں واقع کیڈٹ کالج وانا پر افغان خوارج کے حملے کو پاک فوج نے ناکام بنا دیا، اور تمام 650 طلبہ و اساتذہ کو بحفاظت ریسکیو کر لیا گیا۔
ذرائع کے مطابق کالج کے طلبہ اور اساتذہ کے حوصلے بلند ہیں اور وہ دہشتگردی کے خلاف سیسہ پلائی دیوار کا عزم رکھتے ہیں۔
پاک فوج کی بروقت کارروائی اور کمانڈرز کے بیانات
فیلڈ مارشل عاصم منیر نے آپریشن کے دوران لمحہ بہ لمحہ نگرانی کی اور ہدایت کی کہ “قوم کے یہ معمار ہمارا سرمایہ ہیں، ہر گز کوئی آنچ نہ آنے پائے۔”
آپریشن کمانڈر کرنل محمد طاہر نے بتایا کہ 10 نومبر کو پانچ افغان خوارج نے کالج پر حملہ کیا۔ حملہ آوروں میں ایک خودکش بمبار شامل تھا جس نے دھماکہ کیا جبکہ دیگر دہشتگرد گیٹ میں داخل ہونے کی کوشش کر رہے تھے۔
کرنل محمد طاہر کے مطابق، خوارج نے ابتدائی طور پر زیر تعلیم بچوں کو یرغمال بنانے کی کوشش کی، لیکن سیکیورٹی فورسز کی بروقت کارروائی نے دہشتگردوں کے مذموم عزائم کو ناکام بنایا۔ دہشتگردوں کو مخصوص بلاک میں محدود کر کے طلبہ کی حفاظت یقینی بنائی گئی۔
آپریشن کے دوران رات 10 بجے سے ساڑھے 10 بجے کے درمیان تمام دہشتگرد ہلاک کر دیے گئے۔
طلبہ اور اساتذہ کا ردعمل
زیر تعلیم کیڈٹس نے بتایا کہ دھماکہ کے وقت وہ عصر کی ڈرل کمپٹیشن کی تیاری کر رہے تھے۔ ایک کیڈٹ نے کہا:
“تعلیم کے دشمن کچھ بھی کر لیں، ہمیں تعلیم سے نہیں روک سکتے۔ خودکش دھماکہ ہوا، لیکن پاک فوج کے جوان ہمیں بحفاظت کالج سے محفوظ مقام پر منتقل کر گئے۔”
اساتذہ نے طلبہ کو سکون دیا اور کہا:
“آپ پر سکون ہو جائیں، پاک فوج آگئی ہے۔”
ذرائع کے مطابق، آپریشن کی فوری اور بروقت کارروائی نے ایک خوفناک دہشتگردانہ منصوبے کو خاک میں ملا دیا۔
