چیف آف ڈیفنس فورسز فیلڈ مارشل سید عاصم منیر نے کہا ہے کہ پاک فوج قومی استحکام کو نقصان پہنچانے والے تفرقہ انگیز عناصر سے نمٹنے کے لیے مکمل طور پر مستعد اور تیار ہے۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے گوجرانوالہ اور سیالکوٹ گیریژنز کا دورہ کیا، جہاں انہیں فارمیشن کی آپریشنل تیاریوں اور جنگی صلاحیتوں کو مزید مؤثر بنانے کے اقدامات پر تفصیلی بریفنگ دی گئی۔
دورے کے دوران چیف آف ڈیفنس فورسز نے فیلڈ ٹریننگ ایکسرسائز اور جدید سمیولیٹر ٹریننگ سہولت کا بھی مشاہدہ کیا۔ فیلڈ مارشل عاصم منیر نے فارمیشن کے اعلیٰ پیشہ ورانہ معیار، نظم و ضبط اور مجموعی تیاری کو سراہا۔
آئی ایس پی آر کے مطابق فیلڈ مارشل نے ٹیکنالوجی سے ہم آہنگی کی اہمیت پر زور دیتے ہوئے کہا کہ جدید جنگی ماحول میں پھرتی، درستگی، مؤثر حالات سے آگاہی اور بروقت فیصلہ سازی ناگزیر ہو چکی ہے۔
اس موقع پر انہوں نے افسران اور جوانوں سے ملاقات کی اور ان کے بلند حوصلے، پیشہ ورانہ لگن اور قومی سلامتی کے لیے غیر متزلزل عزم کی تعریف کی۔
چیف آف ڈیفنس فورسز نے مشن پر مبنی سخت اور جدید تربیت کی اہمیت اجاگر کرتے ہوئے کہا کہ پاک فوج اندرونی و بیرونی چیلنجز اور انتہا پسند نظریات سے نمٹنے کی بھرپور صلاحیت رکھتی ہے اور قومی استحکام کو نقصان پہنچانے والی ہر کوشش کا مؤثر جواب دینے کے لیے ہمہ وقت تیار ہے.