راولپنڈی: پاک فوج کی کور کمانڈرز کانفرنس میں واضح کیا گیا ہے کہ قومی یکجہتی، سلامتی اور استحکام کو نقصان پہنچانے کی کسی بھی کوشش کو ناکام بنایا جائے گا، چاہے ایسے عناصر کا تعلق سیاست سے ہو یا کسی اور شعبے سے۔
پاک فوج کے شعبہ تعلقات عامہ (آئی ایس پی آر) کے مطابق 273ویں کور کمانڈرز کانفرنس فیلڈ مارشل سید عاصم منیر کی زیر صدارت منعقد ہوئی، جس میں حالیہ دہشت گردی کے واقعات میں شہید ہونے والوں کے ایصالِ ثواب کے لیے فاتحہ خوانی کی گئی۔
فورم نے دہشت گردی کے واقعات میں جانوں کا نذرانہ پیش کرنے والے شہداء کو زبردست خراجِ عقیدت پیش کیا اور غیر ملکی ایما پر دہشت گردی کے خلاف مادروطن کا دفاع کرنے والوں کی قربانیوں کو سراہا۔
آئی ایس پی آر کے مطابق چیف آف ڈیفنس فورسز فیلڈ مارشل سید عاصم منیر نے مسلح افواج کی غیر متزلزل جرات، پیشہ ورانہ مہارت اور قربانیوں کو خراجِ تحسین پیش کیا۔ کانفرنس کے شرکاء نے اس عزم کا اعادہ کیا کہ بھارتی سرپرستی میں سرگرم تمام دہشت گردوں، سہولت کاروں اور معاونین سے فیصلہ کن اور بغیر کسی رعایت کے نمٹا جائے گا۔
فورم نے ملک بھر میں انٹیلی جنس پر مبنی انسداد دہشت گردی کارروائیوں میں افواجِ پاکستان کی کاوشوں کو سراہتے ہوئے دہشت گردی، جرائم اور سیاسی مفادات کے گٹھ جوڑ کو یکسر مسترد کر دیا۔
کانفرنس میں کہا گیا کہ حکومت اور پاک فوج کی مشترکہ کوششوں کے نتیجے میں ملک بتدریج استحکام کی جانب بڑھ رہا ہے، جبکہ پاکستانی عوام کی ثابت قدم حمایت سے پاکستان عزت و وقار کے راستے پر گامزن ہے۔
شرکاء نے اندرونی و بیرونی سلامتی کی مجموعی صورتحال، درپیش خطرات اور آپریشنل تیاریوں کا تفصیلی جائزہ لیا اور اس بات پر زور دیا کہ مسلح افواج اور عوام کے درمیان تفرقہ پیدا کرنے کی کسی کو ہرگز اجازت نہیں دی جائے گی۔
فورم نے بلوچستان حکومت کے خصوصی ترقیاتی اقدامات کو سراہتے ہوئے کہا کہ یہ اقدامات سماجی روابط اور بہتر گورننس کے ذریعے دہشت گردی کے اسباب کے خاتمے میں معاون ثابت ہو رہے ہیں۔ دیگر علاقوں میں بھی ایسے اقدامات کی ضرورت پر زور دیا گیا۔
کانفرنس میں کشمیری عوام کے حقِ خودارادیت اور ان کی جائز جدوجہد کے لیے پاکستان کی غیر متزلزل حمایت کا اعادہ کیا گیا، جبکہ مسئلہ فلسطین پر پاکستان کے اصولی مؤقف کی بھی توثیق کی گئی۔ فورم نے غزہ میں فوری اور مستقل جنگ بندی، بلا روک ٹوک انسانی امداد کی فراہمی اور فلسطینی ریاست کے قیام کے لیے قابلِ اعتماد راستہ اختیار کرنے کا مطالبہ کیا۔
کانفرنس کے اختتام پر آرمی چیف نے کمانڈرز کو آپریشنل تیاری، نظم و ضبط، معیاری تربیت، جدید ٹیکنالوجی کے استعمال اور میدانِ جنگ میں پیشہ ورانہ مہارت کے اعلیٰ معیار کو برقرار رکھنے کی ہدایات دیں۔
